پارتییا ده‌مۆكراتا كوردستانێ به‌رسڤا ئیدیعایه‌كا رێخستنا په‌كه‌كێ دده‌ت كو گۆتبوو 7 چه‌كدارێن وێ ل خه‌لێفانێ ژ ئالیێ په‌ده‌كێ ڤه هاتینه ته‌سفییه كرن.
هێزێن پاراستنا گه‌ل هه‌په‌گێ، باسكێ له‌شكری یێ په‌كه‌كێ دوهی رۆژا شه‌مبی دانێ ئێڤاری داخویانی دا و تێدا گۆت كو 7 چه‌كدارێن وان كو د خوا‌ستن ژ رووبارێ زاپێ ل هه‌رێما خه‌لێفانێ ده‌رباس ببن، كه‌تن كه‌مینه‌یا پێشمه‌رگه‌هێن په‌ده‌كێ و هه‌روه‌ها گۆت كو ل گۆری ئاگاهیێن وان، ئه‌و 7 چه‌كدار هاتینه ته‌سفییه كرن.
د به‌رسڤا په‌كه‌كێ دا، په‌یڤدارێ په‌ده‌كێ داخویانی دا و ئه‌ڤ ئیدیعایا په‌كه‌كێ ب درهو و دووری راستیێ ب ناڤ كر و گۆت: په‌كه‌كه ناڤێ په‌ده‌كێ و بابه‌تێن نه‌راست ب ئه‌نقه‌ست به‌لاڤ دكه‌ت، ته‌نێ ژ بۆ كو تا‌وان و جینایه‌ت و ده‌ستدرێژیێن خوه یێن نه‌یاسایی ل سه‌ر هه‌رێما باشوورێ كوردستانێ پێ بپه‌چنیت.
د داخویانییا په‌ده‌كێ دا ئه‌ڤ هاتییه گۆتن: بلا گه‌لێ باشوورێ كوردستانێ ژ په‌كه‌كێ بپرسیت گه‌لۆ چه‌كدارێن رێخستنێ ل ده‌ڤه‌را خه‌لێفانێ چ دكن و چ تێكلییا وان ب وێ ده‌ڤه‌رێ هه‌یه؟ و بلا په‌كه‌كه به‌رسڤێ بده‌ت.
رێخستنا په‌كه‌كێ ژ پاش ب داوی هاتنا سه‌ره‌دانا سه‌رۆكێ فرانسایێ ئه‌مانوێل ماكرۆن ژ بۆ باشوورێ كوردستانێ، هێرشه‌كا دژوارا مه‌دیایی ل سه‌ر حكوومه‌تا باشوور، پێشمه‌رگه‌هان و په‌ده‌كێ ده‌ست پێ كرییه، هه‌ر رۆژ دره‌وكا ب شاخ به‌لاڤ دكه‌ت و دفكریت كو گه‌لێ باشوور دێ ژ ڤان درهوێن وێ باوه‌ر كه‌ت.
په‌كه‌كه ئه‌و قاس د‌ره‌وان به‌لاڤ دكه‌ت كو هه‌گه‌ر به‌رسڤا هه‌موو درهوێن وێ بهێته دان، دڤێت حكوومه‌تا باشوور چ كه‌سابه‌ته‌كا دی نه‌كه‌ت، درهوێن په‌كه‌كێ ل سه‌ر هه‌رێما باشوور، پێشمه‌رگه‌هان و په‌ده‌كێ ئه‌و قاس زۆرن، ب ئاوایه‌كی كو هه‌گه‌ر رێخستنێ ئه‌ڤ قه‌ده‌ر درهو ل سه‌ر داگیركه‌ران به‌لاڤ كربان، نها وێ كاریبا نه‌رینا تركێن نه‌ژاد په‌رست ژی بگوهه‌رینیت.
