ئارتێشا ترکیێ دو گوندێن زاخۆ تۆپباران کرن

ئارتێشا ترکیێ دو گوندێن زاخۆ تۆپباران کرن

تۆپخانەیێن ئارتێشا ترکیێ دو گوندێن ل سنۆرێ ناحیا باتیفا یا سەر ب ناڤچەیا زاخۆ ب توندی تۆپباران کرن و د ئەنجاما تۆپبارانێ دا زیانێن مەزن یێن مادی گەهشتنە نیشتەجییێن وان گوندا و خەتا کارەبا ھەر دو گوندان ژی تێک چوون.

کوردستان 24ێ راگەهاند؛ ژ بەر ھەبوونا پەکەکێ ل دەڤەرێ، ئیرۆ دانێ نیڤرۆ تۆپخانەیێن ئارتێشا ترکیێ ھەر دو گوندێن بانکێ ژۆر و بانکێ ژێر ب توندی تۆپباران کرن، د ئەنجامێ دا زیانەکا مەزن گەھشتە خانی، رەز، باخ، ترۆمبێل و بیستانێن وەلاتیان.

نووچەگھانێ کوردستان 24ێ دیار کر کو تۆپباران تەنێ 50 مەترا ل خانیێن وەلاتیان دوور بوو و ژ بەر تۆپبارانێ ترس ل ناڤ نیشتەجیێن وان ھەر دو گوندان و گوندێن دەردۆرێ بەلاڤ بوویە.

ھەروھا ئاشکەرا کر؛ ژ بەر تۆپبارانێ ستوونێن کارەبا ھەر دو گونادان تێک چوون و کارەبا ل سەر وان گوندان قوت بوویە و زییان گەھشتیە جادەیان ژی.

ھێژایی گۆتنێ یە؛ دەڤەرا کو ئیرۆ ھاتیە تۆپبارانکرن، ھەمان ئەو دەڤەرە کو بەریا رۆژەکێ ژ بەر تەقینا بۆمبەیەکا ڤەدایی یا پەکەکێ ل سەر رێیەکێ ب ترۆمبێلەکا گەشتیاران ڤە، دو گەشتیارێن عەرەب جانێ خوە ژ دەست دان و ترۆمبێل ژی تێک چوو.

ھەر دو گوندێن کو ھاتنە تۆپبارانکرن، دکەڤنە سنۆرێ ناحیا باتیفا و تەنێ 25 کیلۆمەترا ژ ناڤەندا ناڤچەیا زاخۆیێ دوورن.

پوستێن ھەمان بەش