ھەر کەسێ تێکەلی لگەل سییاسەتا کوردان دا هەبیت بەرێز کەمال بوورکای ناس دکەت کو د تەڤگەرا نەتەوەیا کورد دا خوەدی دیرۆکەکا درێژە.
ژ بلی کو کەمال بورکای پێنجی سالێن سییاسەتکرنا خوە و سەبەبێن تێکچوونا خوە و رەوشا باکورێ کوردستان د بەر چاڤ دا دەرباس بکەت و خوە ل بێژینگا رەخنەیێ بکەت، ب مەژییێ 50 سال بەرێ، ئێریشی وەلاتپارێزێن کورد دکەت.
گەلۆ بورکای دکاریت ل سەر روویێ دونیایێ ئیدارەیەکا سۆسیالیست یا کو ئەو بەحس دکەت نیشانی مە بدەت. ل سەر ناڤێ سۆسیالیزمێ کو رێخستنی و تەکۆشینا گەلێ کورد و ئارمانجێن وان ئینکار کرن و دکەن، بلا کەس وان رەخنە نەکەت! سۆسیالیزما کو بورکای ھەتا داوییێ پاراست و هێژان ژی دپارێزیت، ھەڤالبەند و برایێن مستەفا کەمال، سەدام و حافز ئەسەد بوون! ل شوونا رەژیمێن دەمۆکراتیک ئاڤابکەن، ل سەر ئەساسێ کاپیتالیزما دەولەتێ، ئۆتۆرەتەری، تۆتالیتەری و دیکتاتۆرییا برۆکراتیکیا پارتییا کارکەرا ئاڤاکرن. ئایدۆلۆژییا سۆسیالیزمێ، یوتۆپیا و تەئۆریا مارکس بوو؛ لێ ھەتا ئیرۆ وەک سازییەک جڤاکی و ئابۆری ل تو وەلاتەکێ ئاڤانەبوویە و ب سەر نەکەتیە.
ژ بلی ھندەک شەریعەتپەرەستان، گەلۆ بورکای دکاریت یەک وەلاتپەروەرەکێ کورد کو دژی دەمۆکراسییێ بیت نیشانی مە بدەت!؟ گەلێن کو دەولەتێن وان نەتەوەیا کورد کرنە کۆلۆنی و ل دژی دەولەتێن خوە دەرناکەڤن و دەما کورد بەرخوە ددەن ژی ھەڤالبەندییا دەولەتا خوە دکەن، بۆچی “برایێ کوردان” بن!؟ لێ ھەتا نھا ئەز ل کوردەکی وەلاتپەروەر راستنەھاتمە کو بێژیت ئەز نەیارێ گەلا مە! بوورکای، چاوا گەھیشتییە وێ قەناعەتێ کو دبێژیت: “ل سەر ناڤێ دۆزا کوردا، ھندەک کەس نەیارتییا سۆسیالیزمێ، نەیارتییا دۆمۆکراسییێ، نەیارتییا براتییا گەلان دکەن.”
لێ پەکەکە ل رۆژئاڤا لەشکەرتییا ئەمەریکا دکەت، دبێژیت: “ئەز سۆسیالیستم، دژی ئەمپەریالیزمێ مە!” پارتییەک ئۆتۆریتەر، تۆتالیتەر و دیکتاتۆرە، لێ سەر و بنێ گۆتنا وان دەمۆکراسییە و دبێژیت: “ئەم دێ تورکیا، رۆژھلاتا ناڤین و ھەموو دونیایێ دەمۆکراتیک کەین!” کەسێن کو ب ئاوایەکێ ئیرۆنیک یارییێن خوە ب ڤێ خاپاندن و رییاکارییێ بکەن، ما دبنە نەیارێن دەمۆکراسییێ!؟
بوورکای دبێژیت: “ئەڤ گۆتنێن شاش ھەتا باندۆر ل کەسێن دەردۆرا مە ژی کرییە. د دەرباسبوونێ دا، مە ل دژی ڤان تێزێن کو ل سەر ناڤێ نەتەوەپەروەرییا کوردا دەرکەتنە مەیدانێ، تەکۆشینەک جددی یا ئایدۆلۆژیک دا و ئەو ژ ھەڤ ڤاڤارتن. پشتی ڤان ھەمی پێکھاتان و ڤی تەمەنی، ما ئەز دیسا دەست ب ڤان مژاران بکەم؟”
گەلۆ یێن دەردۆرا بوورکای، وان چ ھش و زانینەک نینە!؟ کو ھەر یەک ب کێمانی 30-40 سالن د ناڤا سییاسەتێ دانە! کو هێژتا ژی دکارن “د بن باندۆرا گۆتنێن شاش یێن جاھلێن فەیسبۆکێ دا بمینن!”
ووسا دیارە، هێژتا ژی کەمال بورکای تێنەگهشتیە، دۆزا گەلێ کورد، نە دۆزا تەخا و نە ژی دۆزەکا ئایدۆلۆژیکە؛ دۆزەک نەتەوی ویا وەلاتەکێ داگیرکرییە! بوورکای، ب “تەکۆشینا خوەیا جیددی و ئایدۆلۆژیک یا ل ھەمبەر نەتەوەپەرەستان”، ئارمانجا دۆزا نەتەوی ئانیە ئاستا دۆزا تەخان؛ و ل ھەمبەر تەخەکا هەژار (پرۆلیتاریا)، گەلەک بەشێن نەتەوەیا کورد وەک تەخێن نەیار راگهاندینە و بەرێ نەتەوەیا کورد دایە ئارمانجێن خەیالی! ژ بۆ کو بوورکای، تەڤگەرا نەتەوی یا کورد “ژ ھەڤ بەلاڤ کرییە” پەسنا خوە دکە!
بوورکای دبێژیت: “کو سۆسیالیستبوون چ زیانەکێ ناگەھینتە دۆزا کوردا، بەرەڤاژی ڤێ یەکێ، سۆسیالیست ژ ھەرکەسی پێتر ل دژی تادەیا نەتەوی نە، کو مافێ چارەنووسی دپارێزن، ما ئەز ژ مارکس و لینین میناکان بدەم، گەلۆ ژ نوو ڤە راڤە بکەم؟”
سۆسیالیستێن دونیایێ، چ دەمەکێ پشتگری و ھەڤالبەندییا گەلێ کورد نەکریە. بەرەڤاژی وێ ھەڤالتییا نەیارێن گەلێ کورد کریە. میناکا ھەری بالکێش قرکرنا ئەنفال و حەلەبچەیە! سۆسیالیستێن نەتەوەیێن سەردەست، ژ بلی ئیستیسنایان، یێن دی هەموو ل دژی چارەنووسا کوردا بوونە. سۆسیالیستێن کورد، شاشییێن ژییانەوی ئەنجام داینە: نەتەوا خوە ب سنفێن دۆست و دژمن پارڤەکرنە و بەشەک ژ نەتەوەیا خوە وەک نەیارێ ئایدۆلۆژی و ئارمانجێن خوە دیتنە و نەیار راگەهاندنە و ب ناکۆکییێ قاشۆ ناڤا سۆسیالیستان رێخستنێن دژ و نەیارێن ھەڤ ئاڤاکرنە. ئارمانج و رێخستنییا ئیدەۆلۆژیک، کرنە بنگەھا ستراتەژییا خوە. دونیا ب سیستەمێن دۆست و دژمن پارڤەکرنە. جیھانا ئەمپەریایستل و ئیسرایل یەک دەست ب دژمن راگهاندنە. ھەم سۆسیالیست دۆستێن نەیارێن کودان بوون و ھم ئەمپەریالیست تەڤ نەیار ھاتنە راگەهاندن! واتە ژ بۆ کوردان دۆست و ھەڤکارەکی پاشەرۆژێ ژی نەما! سۆسیالیزما کەمال بوورکای ئەڤە بوو!
بوورکای دبێژیت: “یان ژی قای ژ نووڤە بنڤیسم کو پاراستنا دەمۆکراسییێ چ زیانەکێ ناگەهینیتە دۆزا کوردا، بەرەڤاژی پێویستییا گەلێ کورد، ب کێمانی ب قاسی یا ترک، عەرەب، فارسان ب دەمۆکراسییێ ھەیە؟ ئەڤە مژوولبوونەکا بەرەدایی یە. لێ ل گۆری ھندەکان، نە پێویستییا کەدکارێن کورد ب شێوەیێ جڤاتەک بێەجکاندن ھەیە، نە ژی پێویستییا گەلێ کورد ب ماف و ئازادییێن دەمۆکراتیک ھەیە! نە ب مافێ ژنان، نە ب ھەولدانا پاراستنا خوەرستێ”…
گەلۆ بورکای بەحسا کیژان دەمۆکراسییێ دکەت؟ بەحسا دەمۆکراسییا دەولەتێن ترک، عەرەب و فارس دکەت؟ کارێ کوردان، مینا کو تو و ئۆجالان دبێژن، دیمۆکراتیزەکرنا ڤان دەولەتانە یان رزگارکرنا خوە ژ بن نیرێ کۆلەتییا ڤان دەولەتانە؟ بوورکای ژی قەی نزانیت کو کورد تەنێ ژ بۆ دیمۆکراتیزەکرنا ڤان دەولەتان کار بکەت ژی نکاریت ڤان دەولەتان دەمۆکراتیزە بکەت! تەکۆشینەک ب ڤی رەنگی بێ مفایە و د خزمەتا مێتنکاران دایە! بوورکای دبێژیت: بلا کورد کۆلەتییا خوە و جینۆسایدا ل سەر خوە یا بێ تەبات و بێ سنۆر ژ بیربکەن و ب مارژینالێن ڤان جڤاتان، ژ بۆ “ماف و ئازادییێن دەمۆکراتیک، مافێ ژنان و پاراستنا خوەرستێ بتێکۆشن!” ژ خوە ئۆجالان و پارتییا وی، ب مال و جانێ کوردان، ئەڤە چل سالە ڤێ تەکۆشینێ دکەن.
بورکای دبێیت: “نەبەسە کو دەولەتەک مە ھەبیت، دڤێت ل وێرێ، پەیوەندیێن کەدخوارنێ ب تەمامی ب داوی بهێن.”
باشە، ل کیدەرا دونیایێ پەیوەندیێن کەدخوارییێ ھاتینە راکرن کو کورد ژی ژ نھا ڤە ب رووح و جان تێکەڤنە ناڤا ڤێ چالاکی و خەباتێ!؟ ئەم وەسا هزر بکەین ل کووبا و کۆریا باکور “ب تەمامی داوی ل پەیوەندیێن کەدخوارییێ ھاتینە”(!)، ھەتا کورد نەبنە خوەدی دەولەت، دێ چاوا کارن پەیوەندیێن ئابۆری بێ کەتخواری ساز بکەن!؟ لێ بەرێز بوورکای، دەولەتەک کو “پەیوەندیێن کەدخواری ب تەمامی داوی لێ نەهێت” دەولەتێ ناخوازیت!
