گەر مرۆڤ بخوازیت دیرۆکا کەسێن ولاتپاریز کو ب دەستێ پەکەکێ هاتنە شەهید کرن بنڤیسیت، پیدڤییە مرۆڤی سەبرا ئەیووب پێغەمبەر هەبیت، ژ بەر کو هەژمارا وان کەسان ئه‌و قاس زیدەیە کو دەمەک پڕ درێژ بۆ دڤێت هەتا کو مرۆڤ بنڤیسیت، هەر ولاتپاریزەک کو ب دەستێ پەکەکێ هاتبیتە شەهید کرن چیرۆکە تراژیدی هەیە، چیا ب چیا ل کوردستانێ گەریایە داکو خەباتێ ژ بۆی وەلاتێ خوە بکەت، دەست ژ خواندنا خوە بەردایە، دەست ژ ژیانا خوە یا ئاسایی، ژ زارۆک، دایك و باب، هەڤال و هۆگر و خزم و کەسێن خوە بەردایە و ژ بۆ ئازادییا کوردستانێ جان ل سەر دەست، ژ هەموو کەمین، شەر و تانک و تۆپێن دژمنی خەلاس بوویە، لێ ژ کەمین و گوللـه‌یێن پەکەکێ خەلاس نەبوویە.
یەک ژ وان کەسێن ولات پارێز شەهید «تەحسین تەوفیق بێدوهی» یە کو ب دەستێن قرێژ یێن پەکەکێ د کەمینەکا قرێژ دا دهێتە شەهید کرن.
شەهید «تەحسین تەوفیق» کی یە؟
شەهید «تەحسین تەوفیق» بێدوهی ل 3/3/1957ێ، ل گوندێ بێدوهێ یێ سەر ب دەڤەرا بەرواری بالا ژ داییک دبیت، ل سالا 1976ێ دەما حکوومەتا ئیراقی دەست ب راڤه‌گوهاستنا کوردان ل هەرێمێن سنۆری دکەت، خەلکێ گوندێ بێدوهێ ژی به‌ر وێ پێلا راڤه‌گوهاستنێ دكه‌ڤن، شەهید «تحسین» ژی ب خێزان ڤە کۆچبەری دهۆکێ دبیت و هەتا سالا 1980ێ، پشتی ناڤێ وی ژ بۆ لەشکەرییا ئێراقێ دهێت، ل مەها 7 یا سالا 1981ێ بریار دا تەڤلی ریزێن پێشمەرگەیێن کوردستانێ ببیت و ب ئاوایەکێ فەرمی ژ ئالیێ حکوومەتا ئیراقێ ناڤێ وی چوو د ناڤا لیستا کەسێن ژ «یاسایێ ره‌ڤی» دا، ئەو ب هاریکارییا پسمامێ خوە «محەمەد سالح بێدوهی» دگەهیتە گوندێ پاسێ ل دەڤەرا دۆسکییا، ل وێرێ ئەو تەڤلی مەفرەزەیا شەهید «محەمەد سالح بۆتی» دبن و ل وێرێ دمینن.
دەما شەهید تەحسین بێدوهی د ناڤا ریزێن پێشمەرگەیان دا دەست ب خەباتا ژ بۆی ئازادییا کوردستانێ دکەت، دو زەلامێن هێزێن ئەولەکاریێ، دو سیخۆر، دو کەسێن خوەفرۆش کو یەک ژ وان خەلکێ دهۆکێ بوو و ئەم ناخوازین ناڤێ وی ل ڤێرە دیار بکەین، دچنە مالا بابێ شەهید «تەحسین» و دبێژنە وی: «کوڕێ ڤێ مالێ ل کو دەرێ یە؟ ئەو خوەدی ژن و زارۆکە یان ژی زگوردە؟ گەر کوڕێ تە د دەما 3 روژان دا ڤەنەگەریت مالا خوە دێ هەموو ئەندامێن خێزانا وی هێنە زیندان کرن».
عەشقا کوردستانا ئازاد، هێڤیێن ژ بۆی ئازاد کرنا تەڤ مالباتێن کورد، هێڤیێن ئازاد کرنا کوردستانا داییک دبنە ئه‌گه‌ر کو شەهید «تەحسین» ژ چیا ڤەنەگەریت
ئەڤ نووچە دگەهیتە شەهید «تەحسین»، لێ عەشقا کوردستانا ئازاد، هێڤیێن وی یێن ژ بۆی ئازاد کرنا تەڤ مالباتێن کورد، هێڤیێن ئازاد کرنا کوردستانا داییک، دبنە ئه‌گه‌ر کو شەهید «تەحسین» ژ چیا ڤەنەگەریت و دەست ژ ئەرکێ خوە یێ پیرۆز کو پێشمەرگایەتی بوو بەر نەدەت.
پاش ده‌رباسبوونا 3 رۆژان، هەڤژینا وی و خویشکێن وی دچنە هەولێرێ و ل مالا برایێ شەهید «تەحسین» ئانکو «ئەنوەر بێدوهی» دمینن، پاش ل وێرێ بەر ب باژارێ سلێمانیێ دچن و ل مالا برایێ دی یێ شەهید تەحسین ئانکو «عەبدولقادر بێدوهی» دمینن، دەما هیزێن ئەولەکارییا رەژیما بەعس ب ڤێ یەکێ دزانن، تێن و «توفیق بێدوهی و زلفێ بابیری» کو دبنە باب و دایکێن شەهید «تەحسین» دگرن و وان دشینن زیندانا ئالۆکا و ل وێرێ سالەک و 2 مەهان د زیندانا رەژیمێ دا دمینن، ژ بەر ئیشکەنجەیێن بەردەوام و رەوشا هەری خەراب یا زیندانێ چاڤێن بابێ شەهید «تەحسین» راستی نەخوەشییەکێ تێن، ژ بەر کو بەرپرسێن زیندانێ رێکێ نادەن ئەو بهێتە تەداوی کرن، د زیندانێ دا هەر دو چاڤێن خوە ژ دەست ددەت و کۆرە دبیت.
«تەحسین بێدوهی» ل سالا 1982ێ بەر ب ئیرانێ دچیت و ل کامپا زێوە دمینیت و ل وێرێ هندەک ئەرکێن پێشمەرگایەتی کو پێ هاتینە سپارتن جێبەجێ دکەت، ل سالا 1984ێ ئەو دزڤریتە باشوورێ کوردستانێ و ل گوندێ «خرابە» دمینیت، ل وێرێ ئەو و هەڤژینا خوە ب دیتنا هەڤ شاد دبن، دەما یێك سال ل وێرێ دمینن و پاش ل سالا 1985ێ، ژ بەر رەوشا خراب یا داییك و بابێن خوە ژ ناچاری تەسلیمی حکوومەتێ دبیت، و پاش دهێتە عەفۆ کرن.
شەهید «تەحسین» ل سالا 1995ێ ل گەل فازل بەرواری ل کانی ماسێ د چەپەرێن بەرگریکرنێ ژ خاکا کوردستانێ دا بوو
شەهید تەحسین ل سالا 1995ێ ل گەل «فازل بەرواری» كو یێك ژ ریهسپیێن گوندێ بێدوهێ یه، ل کانی ماسێ د چەپەرێن بەرگریکرنێ ژ خاکا کوردستانێ دا بوون، دەما کو وان خواستی ڤەگەرنە ناڤا مالباتا خوە دا، ل گەل «ئەیوب کارەیی» کو پێشمەرگەیەک بریندار بوویە و کۆمەک دی یا پێشمەرگەیان کو ژن ژی ل گەل دا بوون ل 3/9/1995ێ ل نێزیكی گوندێ «ئەلکیشکێ» یێ سەرب پارێزگەها دهۆکێ ڤە کەتنە کەمینەیا چەکدارێن پەکەکێ و ل وێرێ چەکدارێن پەکەکێ یەکەم جار تایەرێن ترۆمبێلا وان ب گولـلەیان ته‌قاندن، پشتره ترۆمبێلا وان ژ رێ دەردکەڤیت و دکەڤیتە د نەهالەکێ دا، دەما ئەو ژ ترۆمبێلی پەیا دبن، شەهید «تەحسین» دەست ددەتە تڤەنگا خوە و دخوازیت هەڤالێن خوە ژ ئێریشا چەکدارێن پەکەکێ بپاریزیت، لێ چەکدارێن بێ رەحم ئەو ب گوللـەیا نیشانەشکێنێ شەهید کر.
پەکەکێ 8 زارۆک هێتیم هێلان
چەکدارێن پەکەکی دیسان پێشمەرگەیەک لەهەنگ، ولاتپاریزەک کورد، بابێ چەندین زارۆکان شەهید کر، پەکەکێ د ڤێ رۆژێ دا ژنەک 36 سالی بێ هەڤژین هشت، 8 زاروکێن وان کو پێویستی ب خوەدیکرنێ و چاڤدێریێ بوون بێی سەمیان هشتن، ئەڤ زارۆکە د دەمەکێ دا تێنە هێتیم کرن کو رەوشا ئابووری یا کوردستانێ گەلەکا خەراب بوو ب رەنگەکێ کو ژ بۆی ده‌بارا ژیانێ خەلک ل دووڤ گولیێن گەنمی دگەریان نانێ رۆژێ بۆ خوه دابین بكه‌ن.
نها ئەم ڤێ پرسێ ژ پەکەکێ دکەین، گەلۆ زارۆکێن شەهید «تەحسین» دێ چەوا بکارن هەوە عەفۆ بکەن د دەمەکی دا کو هەتا نها ژی جلێن ب خوین یێن بابێ وان، ناسنامەیا بابێ وان کو ب ئه‌گه‌را گولـلەیا نیشانەشکێنێن هەوە کون بوویە ل بەر چاڤێن وانە؟ گەلۆ گونەها شەهید «تەحسین» و زارۆکێن وی چ بوو کو ب دەستێ کوردەکی و ل سەر خاکا خوە بهێتە شەهید کرن؟ شەهید تەحسین نە ل ناڤا پارچەیەک دی یا کوردستانێ، نەژی ب دەستێ دژمنەک نەناسکری ڤە هات شەهید کرن، ئەو ل سەر خاکا باب و کالێن خوە و ب دەستێ کوردەکێ کو ژ بۆی براتییا گەلان «کۆلەکرنا کوردان» خەباتێ دکەت، هاتە شەهید کرن.
