ئەو داخویانیێن پەکەکێ د ھەفتەیا چوویی دا بەلاڤکری و ئاوایێ کو ئەو گرسەیا خوە دەرتێخیت مەیدانان دبیت ببیتە سەدەما ئەنجامێن گەلەک مەترسیدار. داخویانیێن پەکەکێ یێن کو دژمناھیا د ناڤبەرا کوردان دا گور دکەت، ژ بۆ ھەبوونا پارتیا خوە جەماوەرێ خوە یێ رادیکال ل رۆژئاڤا و جهێن دی دەرتێخیت مەیدانان، د مەدیا خوە دەست ب درەو و بێ سنۆر کریە، دییار دبیت کو پەکەکە دێ ب ئاوایەکێ چاڤ سۆری تەڤگەریت.
ئەڤ کریارێن پەکەکێ چ مفای ناگەهینتە کوردان. ڤێ دەما کو ئیراق، ئیران، سووریا و ترکیا ژ بۆ ئاڤاکرنا پرێن پەیوەندیێ دانووستاندنێ د ناڤبەرا خوا دا دکەن، و رۆژھلاتا ناڤین بەر ب ھەڤسەنگیەکا نوو ڤە دچیت، کریارێن پەکەکێ دهێنە وێ واتەیێ کو دەست و لنگێن کوردان گرێ بدەت. ھەموو دەولەتێن رۆژھلاتا ناڤین خوە ژ بۆ ژناڤبرنا ھەبوونا حکوومەتا ھەرێما کوردستانێ، ژ بۆ بچووک کرن و بێ باندۆرکرنا وێ مل دانە ھەڤ، پەکەکە ژی ب ئارمانج و ھەلوەستا خوە خزمەتا وان دکەت. پەکەکە مل ب ملێ حەشدا شەعبی یێن کو سۆند خواربوو کو خوینا کوردان ڤەخووون دمەشیت. سەرفەرماندارێ ئیرانێ موحەمەدی گەفا ئێریشا “ئەم دێ ل ھەرێما کوردستانێ دەین” ل سەر سنۆرێ رۆژھلاتێ کوردستانێ دکەت، رێڤەبەریا پەکەکێ ژی ھەڤدەم فەرمانێ ددەتە خەلکی کو “ئێریشێ باشوورێ کوردستانێ بکەن”. بێ گومان ڤان داخویانییێن ھەڤدەم واتەیا خوە ھەیە. واتەیا وێ ژی ئەوە کو پەکەکە لگەل ھێزێن کو دخوازن ھەبوونا ھەرێما کوردستانێ ب داوی بینن دا د ناڤا رێکەفتمەکا ستراتەژیک دایە.
پەکەکە خیانەتێ ل گەریلایان و مالباتێن وان دکەت
کەسەکێ ئاقل بچووک ژی بیت دبینیت کو یا پەکەکە دکەت یاریکرنا ب ئاگری یە. پەکەکە ل کۆبانی رادبیت وان چەند ھەزار کەسێن کو ب خوە ڤە گرێدایی، ل سەر دژبەریا بارزانی بەردەتە کۆلانان، ئەڤە ب چ رامان دهێت؟ ئەڤە ھەلوەستەکا بێ ئەخلاقییە و دژمناھییا کوردانە.
پەکەکە بێ کو چ دەلیل و چاڤکانیا نیشان بدەت، سیناریۆیەک چێکر و ئەو 7 گەریلایێن کو ترکان لێدای و کوشتی، گۆت پێشمەرگەیان ل 7 گەریلایێن مە دایە و ئەو کوشتنە. بەرییا ھەر تشتی پەکەکە ب ڤێ ھەلوەستا خوە یا ئیستیفزازی و نەیار خیانەتێ ل وان گەریلا و مالباتێن وان دکەت. بێ گومان، پەکەکێ ب ڤێ ھەولێ خواست دەولەتا ترک پاقژ دیار بکەت.
زووبەیر ئایدار ل ئاورۆپا، وێنەیێ سێ گەریلایان گرتینە دەست خوە و دبێژیت، “ئەم دخوازین چارەنڤیسێ وان بزانین.” گەر ل زووبەیر ئایدار دا ھندەک مرۆڤاتی هەبیت، ئەو دێ یەکەمجار وێنەیێن ھێمان سادۆ یا 1 مەھی و نیشتیمان سادۆ یا 9 سالی راکەت، یێن کو ب تەقەمەنیا کو ژ لایێ پەکەکێ ڤە ل کامپا قادیا یا ئێزیدییان ھاتبوو پەقاندنێ ڤە هاتبوونە تەرۆرکرن. پاشێ پێویست بوو ژ پەکەکێ بپرسیت، “بۆچی تە ئەڤ زارۆکێن بێگونەھ کوشتن؟”
پەکەکە ل ئەورۆپایێ ژ بۆی وان چەند کەسێن ل دۆرا خوە کۆمکرین بلێتێن بالەفرێ دکریت و جڤینان ب وان د دەتە کرن و ژ وان دخوازیت کو پەدەکێ شەرمەزار بکەن. کەجەکە بانگ ل رەوشەنبیر و ھونەرمەندان دکەت و دبێژیت ل دژی پەدەکێ تەڤبگەرن. پاشێ ئەو دێ چ کەت، ئەو دێ چار-پێنج ژ وان کەسان ل بالەفرێ سووار کەت و وان فرێکەت هەولێرێ، و ئەو دێ خوازن بوویەران بکەنە د ناڤا وێ گەنگەشێ دا و ئێریشی پێشمەرگە کەن.
ئارمانجێن ل پشت ھەموو چالاکیێن پەکەکێ ئەڤەنە:
یەکەم؛ ئەو ل بەهانەیەکێ دگەرن کو ئێریشی چەپەرێن پێشمەرگەیێن ل گرێ ئەلھۆ (گرێ ھەککاری) و گرێ چارچەل ل خەتا ئامێدیێ بکەن. پێشمەرگە ئەڤ دەڤەرە، ژ بەر شەرێ داعشێ ڤالاکربوون، د مەھا خزیرانێ دا ژ نووڤە چوونە سەنگەرێن خوە یێن بەرێ. نە ب تەنێ پەکەکە ژ بجیھبوونا پێشمەرگەیان ل سەرێ مەتینی عاجزە بەلکو ھەمان دەم دا دەولەتا ترک ژی عاجزە. گەر پێشمەرگە ڤی جھی ب جیهـبهێلن، دەولەتا ترک دێ د مەھا نیسانا سالا بهێت دا هێت و ڤان ھەر دو گرێن ستراتەژیک گریت. دێ باژێرێ ئامێدییێ کەڤیتە د دەسترەسا چەکێن ترکان. وەکو یا ل کێستە و ھرۆر پێک ھاتی دا ل ئامێدییێ ژی پێک هێت. پەکەکە ڤێ دخوازیت؟
دویەم؛ پەکەکە ل باژێران دێ وەکو بوویەرا کامپا قادیا و خوارنگەھا ھۆقوباز ھندەک تەقین و کوشتنا ئەنجام دەت. دێ بێژیت ئەز ل ھەولێرێ ل دژی داگیرکەران شەری دکەم و دێ د یەک یان دو شەریکەیان دا بۆمبەیان تەقینیت و چەند کەسان کوژیت. دێ ڤێ یەکێ وەکو تێکۆشینا ل دژی داگیرکەریێ نیشان دەت. لێ ئارمانج ئەوە کو وەبەرھێنەرێن ئابۆری بترسینن کو ئەو ڤەکشن، و ھەولێرێ کو یەک ژ باژێرێن ھەری ئارامە ل ئیراق و رۆژھلاتا ناڤین، کێشنە ناڤا فەوزایەکا کۆر و بێ مفا. پەکەکە دخوازیت پشتگریا قادا ناڤنەتەوەیی یا ژ بۆ ھەرێما کوردستانێ ژ ناڤ ببەت. ھەگەر پەکەکە ڤێ یەکێ بکەت دێ چ چێبیت، دێ دەستێ بەغدا خورت بیت و کوردستان مەحکوومی بەغدایێ بیت. ھەرێما کوردستانێ دێ بن گەفێن حەشدا شەعبی، ئیران و بەغدایێ بیت و دێ شنگال و کەرکووک ژ ھەرێما کوردستانێ هێنە قودکرن و نەشێت پرۆژەیێن ئافراندنا ئازادییا نەتەوەیا کورد پێکبینیت و ئەو دێ تەنێ ژ بۆ سەر پێیا مانێ ھەول دەت. پەکەکە ڤێ دخوازیت؟
سێیەم؛ پەکەکە دێ جەماوەرێ پارتیێن کو ل گەل وان دا رێکەفتن گرێدایینە دەرێخیتە کۆلانان ژ بۆ کۆما کو د بن ناڤێ رۆژنامەڤانیێ دا ب سیخوریێ ھاتیە گرتن و دێ ل شنگال و مووسلێ دەنگێ خوە دەتە لیستەیا حەشدا شەعبی. ئەو دێ بخوازیت ھەرێما کوردستانێ ل پارلامەنتۆیا ئیراقێ لاواز بکەت. پەکەکە ڤێ دخوازیت؟
چارەم؛ پەکەکە دبێژیت “دێ رۆژئاڤا یان یا من بیت ئان ژی یا ئاخا رەش بیت” و ژ بلی خوە ل رۆژئاڤا چ ھێزێن دی قەبوول ناکەت. ژ بەر ڤێ سەدەمێ، جوانێن شۆرەشگەر بۆمبەیان ل ڤێرە و وێرا هە دتەقینن، و ئاساییشا گشتی یا پەیەدێ مرۆڤان ب ئاڤا کەلاندی دشەوتینیت و وان دکوژیت. پەکەکە ژ بۆ بەرژەوەندیێن خوە یێن تەنگ رۆژئاڤا بەر ب تونەبوونێ ڤە کاش دکەت. گەر وسا بچیت، دێ رۆژئاڤا د ناڤبەرا دەولەتا سوری و ترکیایێ دا هێتە پارڤەکرن. ب کورتی ژ بۆ کوردان تەنێ دێ خولامەتی مینیت. پەکەکە ڤێ دخوازیت؟
بەلێ، پەکەکە ڤانا دخوازیت. پەکەکە دژمناتیا ھەرێما کوردستانێ دکەت. پەکەکە د بن ناڤێ شەرێ ل دژی داگیرکەریا ترک دا مل ب ملێ داگیرکەران دێ ئێرشی ھەرێما کوردستانێ کەت. گاڤا ڤی کاری دکەت، ئەو ب وێرەکی، عەگیدی دەرناکەڤیت قادێ و تشتێ کو ئەو دخوازیت نابێژیت.
رێڤەبەریا پەکەکێ خیانەتا خوە یا ھەری بێ روومەت، رەزل، پیس و خەدار یا د دیرۆکا کوردستانێ دا د بن جلکێن ژنان، مەشێن گەنجا، جەنازەیێن شەرڤانێن زارۆک و درووشمەیان دا ڤەدشێریت.
تشتێ کو پەکەکە دکەت یاریکرنا ب ئاگری یە. لێ دڤێت پەکەکە بزانیت کو گەلێ کوردستانێ ئێدی ئەو درەوێن رەوان یێن قەرەیلان و ئەو مەژییێ تەڤنپیرکێ گرتی یێ جەمیل بایک، باش ناسدکەت. ئەڤ یاریە سەرناگریت.
بەلێ، پەکەکە یاریا ب ئاگری دکەت، لێ ئەڤ ئاگرە ھەری زێدە پەکەکێ دشەوتینیت. ژ بەر کو پەکەکە ئەڤە دو سالن ب تەنا سەرێ خوە دبێژیت و یاریا دکەت، ھەتا نھا کەسێ بەرسڤا ئاگرێ پەکەکێ ب ئاگری نەدایە. دڤێت پەکەکە رابۆرییا خوە ژ بیر نەکەت، گەر کو بەرسڤا پەکەکێ ب ئاگری بهێتە دان، دێ جەمیل بایک بێھنا خوە دیسا ل ئورمیێ ڤەدەت. وەکی دی، ئەوێن کو پەکەکە دخوازیت وان ب ئاگری بسۆژیت، مینا پەکەکێ خەبسێ ناکەن، لێ گاڤا کو ئەو ئاخڤین ژی، ئەو گەلەک قەنج تاخڤن. ئەڤ ئاگرە دێ پەکەکێ ب خوە شەوتینیت.
