پارێزەرێ مالباتا دەدەئۆگولار پەیامەک ل سەر دۆزێ بەلاڤ کر

پارێزەرێ مالباتا دەدەئۆگولار پەیامەک ل سەر دۆزێ بەلاڤ کر

پارێزەرێ مالباتا دەدەۆگوڵار کو 30ێ تیرمەھا 2021ێ ل ناڤچەیا مەراما کۆنیایێ د ئەنجاما ئێریشەکا نیژاتپەرەستێن ترک دا 7 ئەندامێن وێ جان دابوون، ل سەر حەسابا خوەیا تویتەرێ دەربارێ دۆزا مالباتێ دا داخویانیەک بەلاڤ کر و دا زانین: “ئەم نیگەرانین ژ وێ یەکێ کو بەلگە و دەلیلێن دەربارێ دۆزێ دا بێنە ژناڤبرن.”

پارێزەرێ مالباتا دەدەئۆگولار عەبدولرەحمان کارابولوت، دوهی 10ێ ئیلۆنا 2021ێ دەربارێ دۆزا مالباتا دەدەئۆگوڵار دا کو تێ دا 10 کەس ژ بەر تاوانا کوشتنا ب قەست تێنە دادگەهکرن، داخویانیەک بەلاڤ کر و دا زانین، وان چەندین جار ژ بۆ بدەستخستنا تۆمارێن کامیرایان و پەیامێن گرۆپا واتسەبێ کو بەشەکێ کۆمکوژیێ ل سەر وێ گرۆپێ ھاتبوو رێکخستن، سەری ل دۆزگەریێ دانە و دەستنیشان کر: “تەڤی سەرلێدانێن مەیێن دەڤکی و نڤیسکی ب چ ئاوایی پەیامێن کۆما واتسابێ و تۆمارێن کامیرایێ یێن دەربارێ کۆمکوژیێ دا لگەل مە دا نەھاتنە پارڤەکرن.”

عەبدولرەحمان کارابولوت بەری نھا 1ێ تەباخا 2021ێ دا ژی، دەربارێ بەلگەیێن وێ ئێریشێ دا ب ھەمان ئاوایی داخویانیەک بەلاڤ کربوو و دیار کربوو: “مە ژ دۆزگەری تۆمارا کامیرایێ خواست، لێ وان نەدا. پشتی دو دەمژمێران، تۆمارا ڤیدیۆیی ل سەرا خەبەر ھات بەلاڤکرن. ھابەر ژ ڤیدەئۆیا 45 خولەکی، پارچەیەک یەک خولەکی بەلاڤکر و ھەول دا کو تێگھیشتنەکێ چێبکەت کو کوژەری ژ بۆ خوە پاراستنێ تەقە کریە.”

پارێزەرێ مالباتێ دەستنیشان کر، ب ڤێ یەکێ مافێ وان یێ پاراستنێ دهێتە بنپێکرن و گۆت: “ئەم نیگەرانین ژ وێ یەکێ کو بەلگە و دەلیل بێنە ژناڤبرن.”

ئێڤارا رۆژا ئینێ 30ێ تیرمەھا 2021ێ ل ناڤچەیا مەرام سەر ب پارێزگەھا کۆنیایێ یا ترکیێ، نەژادپەرەستێن ترک ئێرشی مالباتەکا کورد کرن و د ئێرشێ دا یاشار، ئیپەک، سەرپیل، سەراپ، سیبەل، مەتین و بارش دەدەئۆگولار 7 کەس ژ ئەندامێن وێ مالباتێ ھاتنە کوشتن.

پوستێن ھەمان بەش