پارتییا ئازادییا كوردستانێ پاكێ، د سالڤەگەرا 60ێ یا شۆرەشا ئیلۆنێ دا پەیامەک بەلاڤ کر و تێدا راگه‌هاند، «شۆرەشا ئیلۆنێ، پێل و باهۆزەکا خورت و مەزن بوو کو ئەڤ ئەورێن رەش ژ سەر ئاسمانێ هەر چار پارچەیێن کوردستانێ دوور خست؛ هێڤی و هەست و بیر و باوەرییا نەتەوی، نشتیمانی جارەکا دی ل هەر چار پارچەیێن کوردستانێ ڤەژاند».
ده‌قێ په‌یاما پاكێ:
ئیرۆ 60ەمین سالڤەگەرا شۆرەشا ئیلۆنێ یە، د 11ێ ئیلۆنا 1961ێ دا ب رێبەراتییا مەلا مسته‌فا بارزانی یێ نەمر و پارتییا دەمۆکراتا کوردستانێ، گەلێ مە یێ باشوورێ کوردستانێ ل دژی دەولەتا ئیراقێ سەرهلدا.
پشتی کو بەرخوەدانا دێرسمێ ب جینۆسایده‌كا مەزن هاتییە ژناڤبرن و پشتی کو کۆمارا کوردستانێ (کۆمارا مەهابادێ) هاتییە رووخاندن، دەمەکێ درێژ ئەورێن رەش، بێدەنگی و شکەستەکا مەزن خوە بەردابوو سەر ئاسمانێ هەر چار پارچەیێن کوردستانێ.
شۆرەشا ئیلۆنێ، پێل و باهۆزەکا خورت و مەزن بوو کو ئەڤ ئەورێن رەش ژ سەر ئاسمانێ هەر چار پارچەیێن کوردستانێ دوور خست؛ هێڤی و هەست و بیر و باوەرییا نەتەوی، نشتمانی جارەکا دی ل هەر چار پارچەیێن کوردستانێ ڤەژاند.
شۆرەشا ئیلۆنێ شۆرەشا هەر چار پارچەیێن کوردستانێ بوو، شۆرەشا ئیلۆنێ ل هەر چار پارچەیێن کوردستانێ، ل هەر چار ئالیێ جیهانێ ژ نوو ڤە ئاگرێ ڤەژینا کوردایەتیێ پێخست.
پشتی شۆرەشا ئیلۆنێ 9 سالان، پشتی سەرهلدانا گەلێ مە یا قەهرەمانانە، دەولەتا ئیراقێ پاشدە گاڤ ئاڤێت و ناچار ما کو ل گەل مەلا مسته‌فا بارزانی یێ نەمر روونە.
رۆژا 11/3/1970ێ رێبەراتییا شۆرەشا باشوورێ کوردستانێ و دەولەتا ئیراقێ پەیمانا ئۆتۆنۆمیێ ئیمزا کرن کو مافێن گەلێ کوردستانێ یێن ئیداری، سیاسی، ئابووری و چاندی هاتن ناسکرن و سیستەما ئۆتۆنۆمیێ، ئانكو سیستەما خوە برێڤەبرنێ هاتە دامەزراندن.
ئەم د 60ەمین سالڤەگەرا شۆرەشا ئیلۆنێ دا، ب هەست و بیر و باوەریێن خوە یێن نەتەوی، نشتمانی شۆرەشا ئیلۆنێ وەک شۆرەشا خوە دبینن و مەلا مسته‌فا بارزانی یێ نەمر و هەموو شەهید و کەدکارێن شۆرەشا ئیلۆنێ ب گرامی ببیرتینین.
