هه‌ڤپه‌یمانییا ناڤده‌وله‌تی ئاگاهی ل ده‌ربارێ هێرشا شه‌ڤا ده‌رباسبوویی یا ل سه‌ر باله‌فرگه‌ها هه‌ولێرێ به‌لاڤ كرن و راگه‌هاند كو یه‌كینه‌یێن وان درۆنێن كو هێرش پێ هاتییه ئه‌نجام دان ئێخستنه.
به‌رده‌ڤكێ هه‌ڤپه‌یمانییا ناڤده‌وله‌تی ,واين مارتو ئیرۆ رۆژا یه‌كشه‌مبی 12/9/2021ێ گۆت: ل شه‌ڤا ده‌رباسبوویی ب دو درۆنێن ب چه‌ك هێرشا هێزێن مه یێن ل باله‌فرگه‌ها هه‌ولێرێ هات كرن، چ زراره‌ك جانی و ماددی ل په‌ی هێرشێ نه‌هاتنه.
ده‌ست نیشا كر، یێك ژ درۆنێن كو هێرش پێ هاتییه ئه‌نجام دان، ژ هێلا هێزێن هه‌ڤپه‌یمانییا ناڤده‌وله‌تی ڤه هاتییه ئێخستن، و درۆنا دن كه‌تییه سینۆرێ باره‌گه‌ها هه‌ڤپه‌یمانان، لێ به‌لێ چ زراره‌ك ل په‌ی نه‌بوو.
مارتو دبێژیت: هه‌ر هێرشه‌كا ل سه‌ر حكوومه‌تا ئیراقێ، هه‌رێما باشوورێ كوردستانێ و هه‌ڤپه‌یمانییا ناڤده‌وله‌تی بێ كرن، سه‌روه‌رییا یاسا و نشتیمانی ژ ناڤ دبه‌ت و هه‌روه‌ها هێزێن ئارتێشا ئیراقێ، هێزا پێشمه‌رگه‌هان و هه‌ڤپه‌یمانییا ناڤده‌وله‌تی دئێخیته د خه‌ته‌ریێ دا.
ل شه‌ڤا ده‌رباسبوویی ب دو درۆنێن ب چه‌ك هێرشا باله‌فرگه‌ها هه‌ولێرێ هات كرن، هێرشێن ب ڤی رەنگی یێن ل دژی هێزێن ئامەریکی و بەرژەوەندیێن ئامەریکایێ ل مەهێن داوی زێدە بوون، هەتا نها کەسی بەرپرسیارییا هێرشێ هه‌لنه‌گرتییه، لێ به‌لێ کۆمێن ئیراقی یێن ئالیگرێن ئیرانێ ژ بۆی ڤان هێرشان بەرپرسیار دهێن حه‌ساب كرن.
ل مەها تیرمەهێ ژی ب درۆنان ل دژی بالافرگەها هەولێرێ هێرش هاتبوو کرن.
