دەرکەت ھۆلێ کو چالاکڤانێ سیاسی یێ کورد یاسر مەنگووری، کو دو مەھان بەری نها ل پیرانشارێ ژ ئالیێ ھێزێن ئەولەکاریا ئیرانێ ڤە ھاتبوو بنچاڤکرن، ب ئیشکەنجەیێ ھاتە کوشتن.
ل گۆری رێخستنا مافێن مرۆڤان یا ھەنگاو، چالاکڤانێ سیاسی یێ کورد یاسر مەنگوری، کو دو مەھ بەرێ ژ لایێ هێزێن ئەولەکاریا ئیرانێ ڤە ھاتبوو بنچاڤکرن، د دەما لێپرسینا ل زیندانا ڤێ سازیێ دا د ئەنجاما ئیشکەنجەیێن گران دا مر.
ھات راگھاندن کو جەنازەیێ یاسر مەنگوری رادەستی مالباتا وی نەھاتیە کرن، لێ مالباتێ ئیرۆ سەرساخی قەبوول کر.
خزمەکی یاسر مەنگوری دبێژیت کو “د 8ێ ئیلونێ دا، فەرمانداریا سازییا ئیستیخباراتی یا ئیتیلاعاتا ئورمیێ مالباتا یاسر مەنگور ب تەلەفۆنی ئاگەهدار کرنە کو کورێ وان مریە.”
خزمێ چالاکڤانێ سیاسی، کو نەخواست ناڤێ وی بهێتە ئەشکەرا کرن، گۆتە مالباتێ کو یاسر مەنگوری د دەما لێپرسینا پۆلیسان دا پشتی ئێشکەنجەیێ مریە.
یاسر مەنگوری، د 26ێ خزیرانا 2021ێ دا ژ ئالیێ ھێزێن ئیستیخباراتا ئیرانێ ڤە دەما ژ مالا خوەیا ل پیرانشارێ دەرکەتی هات گرتن و ژ بۆ یەک ژ گرتیگەهێن سەر ب ڤێ سازیێ ڤە هات برن.
یاسر مەنگوری، بابێ دو زارۆکانە، ژ رۆژا کو دو مەھ بەرێ ھاتبوو بنچاڤکرن رێک ب وی نەھاتیە دایین کو لگەل مالبات و پارێزەرێ خوە دا ھەڤدیتنێ بکەت.
ل گۆری راپۆرتا ھەنگاوێ ل سالێن 2017-2021، 23 کورد د ئەنجاما ئیشکەنجەیا ل گرتیگەھێن ھێزێن ئەولەکاریا ئیرانێ دا مرنە. 15 ژ وان کەسێن کو د ئیشکەنجەیێ دا ژیانا خوە ژ دەست دانە چالاکڤانێن سیاسی نە.
