رێخستنا په‌كه‌كێ ئیرۆ رۆژا سێشه‌مبێ 14/9/2021ێ د ده‌ربارێ دو رێڤه‌به‌رێن خوه یێن رۆژئاڤا كوردستانێ داخویانی به‌لاڤ كر و تێدا دیار كر، «عیرفان گولەر» ب كۆدناڤێ عادل ئورفا و «سه‌عید ئوچلو» ب كۆدناڤێ فەرات ب نه‌خوه‌شیێ جانێ خوه ژ ده‌ست دانه.
پشتی ڤێ داخویانیا پەکەکێ شک و گۆمان د ناڤا کادرۆیێن پەکەکێ دە، ب تایبەت کادرۆیێن قەدیم دە دروست بوون، ژبەرکو پەکەکێ ئەڤ دو کادرۆ د جیەکێ کو دشبهی زندانێ هشتبوون و ب زۆرێ نڤیس ب وان ددان نڤیساندن.
چما شک و گۆمان ل سەر مرنا ڤان دو کادرێن پەکەکێ پەیدا بوو؟!
ڤان دو کادرێن پەکەکێ کەد و چالاکییێن گەلەک زێدە د ناڤا رێزێن پەکەکێ دا هەنە، ئەڤ دو کادرە ژ وان کادرێن پەکەکێ نە کو پەکەکە کریە پەکەکە، ژ کادرێن دەستپێکی بوونە، د زیندان و حەبسێن دەولەتێ دا راستی ئیشکەنجەیێن دژوار هاتنە، پشتی کو هاتنە بەردان دیسا قەستا چیا کر و د ناڤا رێزێن پەکەکێ دا جی گرتن، رەغمێ کو خوەدی تەجرووبە و کەد و شیانێن خوە یێن تایبەت ژی بوون، لێ پەکەکێ چ پلە و پایە ب وان نەدان، ژبەرکو پەکەکە وان کەسێن ژ زیندانێ ئازاد دبن ژ بۆ خوە وەک بەلا دبینیت.
چاڤکانیێن پێگەها دارکا مازی ل رۆژئاڤایێ کوردستانێ ئاشکەرا کرن، پەکەکێ ئەڤ کەسانە ل جیەکێ کو دشبهی زندانێ هشتبوون و ل سەر وان فەرز کربوو کو دەربارا دیرۆکا پەکەکێ و ژیانا ئۆجالان بنڤیسن، ڤان کادرا ب چ ئاوا هەست نەکر کو ئەو ژ زیندانێ ئازادبوونە، ئەڤ کەسە کەسێن ئایدۆلۆژیک بوون، وان دگۆت پەکەکەیا نها وەکو پەکەکەیا سەردەما خەیری دۆرمۆش نینە، هەر ژ بەر ڤێ یەکێ پەکەکێ ئەو د ژوورەکا بچووک دا د بن چاڤدێریێ هێلان و ب دارێ زۆرێ ل سەر وان فەرز کر کو ل سەر دیرۆکا پەکەکێ و ژیانا ئۆجالان بنڤیسن.
مرنا ڤان دو کەسان د دەما 15 رۆژان دا، شک و گۆمان ل جەم کادرێن کەڤن یێن پەکەکێ، ب تایبەتی کادرێن ژ پەکەکێ ڤەقەتیایی دا دروست کرنە، ب ئاوایەکێ کو نها د سۆسیال مەدیایێ دا ب توندی نیقاش ل سەر مژارا کوشتنا ڤان دو کادران دهێتە کرن.
