ژ بەر تەقینا 3 بۆمبەیێن ڤەدایی یێن پەکەکێ، 2 پێشمەرگە شەھید بوون و ھەژمارەک پێشمەرگە ژی بریندار بوون.
ڤێ ئێڤارێ ل ناحیا دینارتێ یا سەر ب ئاکرێ ڤە ل دوھۆکێ، د ئەنجاما تەقینا سێ بۆمبەیێن چاندی دا ب وەساییتەکا ھێزێن پێشمەرگە ڤە، دو پێشمەرگێ شەھید بوون و ھەژمارەک پێشمەرگە ژی بریندار بوون.
چاڤکانیەکی ئاگاھدار، پشتراست کر کو بۆمبەیێن ڤەدایی تەقیانە و ھەژمارەک پێشمەرگە بوونە ئارمانج.
د ناڤا چەند مەھێن بۆری دە ژ بەر دانینا بۆمبە و مایینان ژ ئالیێ پەکەکێ ڤە، چەندین پێشمەرگە شەھید و بریندار بوون.
پێش نها ژی، رۆژا 21ێ تەباخا 2021ێ، وەزارەتا پێشمەرگە راگھاند؛ بەشا ئەندەزیاریا سەربازی یا ھێزێن پشتەڤانیا یەک یا وەزارەتا پێشمەرگە کاریە بۆمبەیەکا ڤەدایی ل سنۆرێ زینا وەرتێ پووچ بکەت، کو پەکەکێ ڤەدابوو.
ھەروھا رۆژا 18ێ تەباخا 2021ێ، ناڤەندا مەدیایی یا وەزارەتا پێشمەرگە ئاشکەرا کربوو کو ل سنۆرێ ناڤچەیا ئامێدیێ چەکدارێن پەکەکێ بۆمبەیەک ل سەر رێیا ھاتووچوونێ یا پێشمەرگە و خەلکێ دەڤەرێ دانایە و د ئەنجاما تەقینا ب ترۆمبێلا پێشمەرگە دا، پێشمەرگەیەک بریندار بووبوو.
دیسا د مەھا بۆری دا رۆژا 5ێ تەباخا 2021ێ، ھێزێن پێشمەرگە 65 کیلۆگرام TNT کو چەکدارێن پەکەکێ ل سەر رێیا ئامێدی – دێرەلووک دانابوون، پووچ کربوون.
