د ته‌قینا مایینه‌كێ دا كو رێخستنا په‌كه‌كێ دوهی ل به‌ر رێیا پێشمه‌رگه‌هان ل سنۆرێ دینارتێ دانابوو، دو ئه‌فسه‌رێن پێشمه‌رگه‌هان شه‌هید كه‌تن، پارێزگارێ دهۆكێ ل ده‌ربارا بوویه‌رێ ئاخڤی و گۆت: «جهێ داخێ یه پێشمه‌رگه ژ هێلا دژمنه‌كێ ژ داییك و باب كورد ڤه، بهێنه شه‌هید خستن».
ئه‌فسه‌رێن پێشمه‌رگه‌هان «حه‌مدی جابر و ئیسماعیل ئۆسمان» دوهی رۆژا چارشه‌مبێ 15/9/2021ێ د كریارا ته‌رۆریستی یا په‌كه‌كێ دا، ل سنۆرێ ناڤچه‌یا دینارتێ یا باشوورێ كوردستانێ شه‌هید كه‌تن، ئیرۆ ئه‌و د مه‌راسیمه‌كێ دا ل گۆڕستانا شاخكێ یا دهۆكێ، ب ئاخێ هاتن سپارتن.
د.عەلی تەتەر پارێزگاری دهۆک، ل ده‌ربارا بوویه‌رێ بۆ په‌یامنێرێ رووداوێ ئاخڤی و گۆت: «جهێ داخێ یه ئیرۆ ببینین پێشمه‌رگه‌هێن کوردستانێ ب ده‌ستێ دژمنێن گەلێ کوردستانێ وه‌رن شەهید خستن، ژ هێلا هنه‌ك كه‌سان کو ژ داییک و بابه‌كی کورد ژی ژ داییک بوونە».
رێخستنا په‌كه‌كێ د 10 مه‌هێن رابووری دا، 11 جاران TNT و مایین ل به‌ر رێیا پێشمه‌رگه‌هان دانانه، پرانی ژێ ژ هێلا پێشمه‌رگه‌هان ڤه هاتنه ژناڤ برن، لێ به‌لێ ل مه‌ها ئادارا ئیسالێ TNT یه‌كا دن یا په‌كه‌كێ ل سنۆرێ سیده‌كانێ ب ترومبێلا پێشمه‌رگه‌هان ڤه ته‌قییا و پێشمه‌رگه‌هه‌ك ب ناڤێ «تارق قادر» شه‌هید كه‌ت و هه‌روه‌ها پێشمه‌رگه‌هه‌ك ب ناڤێ «مزه‌فه‌ر فه‌رهاد» بریندار كه‌تبوو.
ئه‌ڤ نه جارا یه‌كه‌مینه، رێخستنا په‌كه‌كێ كریارێن ب ته‌رزێ ته‌رۆرێ ل دژی پێشمه‌رگه‌هێن باشوورێ ولات ئه‌نجام دده‌‌ت، ل سالا رابووری ژی ب مایین و TNT یان ل چه‌مانكێ ئێریشی هێزا پیشمه‌رگه‌هان كر، هه‌موه‌خت ل ئامێدیێ و سحێلا.
په‌كه‌كێ د كێمتری ساله‌كێ دا 12 پێشمه‌رگه شه‌هید كرنه
هێژای ببیرئانینێ یه، حكوومه‌تا باشوورێ كوردستانێ، ژ ده‌ما كه‌تنا رژێما به‌عس یا سه‌دام حسێن، ده‌وام هه‌ولا پاقژكرنا دۆل و چیایێن كوردستانێ ژ ماینان دكه‌ت كو ل وه‌ختا خوه رژێما دیكتاتۆر ل به‌ر پێشمه‌گه‌هان د دانان، لێ به‌لێ رێخستنا په‌كه‌كێ ژ نووڤه هاتییه رێبازا سه‌دام گرتییه و رێیا پێشمه‌رگه‌هان TNT دكه‌ت.
رێخستنا په‌كه‌كێ كو ژ بۆی هه‌ر چار پارچه‌یێن ولات بوویه به‌لا و سه‌رئێش، ژ مه‌ها 10 یا سالا 2020ێ، 13 جاران ئێریشا پێشمه‌رگه‌هان كرییه، هه‌روه‌ها د ڤێ ده‌مێ دا، 12 پێشمه‌رگه شه‌هید خستنه.
