برێکارێ وەزارەتا پێشمەرگە سەربەست لەزگین ل واشنگتۆنێ ب داخویانیەکێ دیار کر؛ ناڤەندێن ھەماھەنگیێ ل خانەقین، کەرکووک، مەخموور و رۆژئاڤایێ مووسلێ ھاتنە پێکانین، دو ناڤەندێن سەرەکی ژی ل ھەولێر و بەغدایێ ھاتنە پێکانین و بوویە دەمەک کو دەست ب کارێ خۆ کرنە.
سەربەست لەزگین دا زانین، ئەو ھەر دو ناڤەند تیمەکن ژ ئەفسەرێن ھەر دو وەزارەتا پێشمەرگەیێ ھەرێما کوردستانێ و وەزارەتا بەرەڤانییا ئیراقێ، ژ بۆ پێکانینا دو لیوایێن ھەڤبەش کار دکەن، بۆ پاراستنا وان دەڤەرێن کو د ناڤبەرا ھەرێما کوردستانێ و ئیراقێ تەماسن، ئەگەر مژارا ھلبژارتنێن 10ێ جۆتمەھێ یێن ئیسال نەبایە، کارێن پێکانینا وان دو لیوایان تەمام بووبوون.
لەزگین ئاشکەرا کر: “ئەڤ ھەماھەنگی دەستپێکەکا گەلەک باشە، کو د ناڤبەرا حکوومەتا ھەرێما کوردستانێ و بەغدایێ دا چێبوویە، ب تایبەتی د ناڤبەرا دەزگەھێن ئەولەھی و سەربازی دا.”
برێکاری وەزارەتا پێشمەرگە سەربەست لەزگین ل سەر رێکەفتنا شنگالێ دیار کر؛ ئالیێ ئیراقێ ئامادەبوونا خوە ژ بۆ جێبەجێکرنا رێکەفتنا شنگالێ دایە نیشاندان، لێ ئاستەنگ ھەیە ژ بۆ جێبەجێکرنا وێ رێکفەتنێ، ئەو ژی کۆم و چەکدارێن ژ ئالیێ پەکەکێ ڤە ھاتنە پێکانین، ل شنگالێ تێنە ئاراستەکرن.
سەربەست لەزگین دا زانین، ئەو ئالی ژ رۆژئاڤا تێنە ناڤ چیایێ شنگالێ، دا کو رەوشا وێ دەڤەرێ تێک بدەن.
لەزگین دەستنیشان کر: “رێکەفتنا شنگالێ وەکە پراکتیک نەھاتیە جیبجیکرن، لێ بەلێ ئامادەبوون ژ ئالیێ ئیراقێ ڤە ژ بۆ ڤێ مژارێ ھەیە، ژ بلی ڤێ، کۆمەک ژ حەشدا شەعبی پشتەڤانیا وان چەکدار و میلیشیایان دکەن کو ھەتا نھا ل شنگالێ نە، کو دڤێت حکوومەتا ئیراقێ، وان ژ وێرێ دەربکەت و ئاوارەیێن شنگالێ ڤەگەرن جھ و وارێن خوە.”
