رەوشەنبیر و نڤیسکارێ کورد موسا ئانتەر ئیرۆ هاتە ب بیرئانین

رەوشەنبیر و نڤیسکارێ کورد موسا ئانتەر، ئیرۆ د سالڤەگەرا کوشتنا خوە دا، هاتە ب بیرئانین.

ئیرۆ رەوشەنبیر و نڤیکسارێ کورد موسا ئانتەر، د سالڤەگەرا کوشتنا خوە دا ژ ئالیێ مالبات و حەزکریێن خوە ڤە هاتە ب بیرئانین. پارێزگەها مێردینێ، ب بەهانەیا بیرئانینا موسا ئانتەر ل باژێر ھەموو چالاکی ھەتا دەما 15 رۆژان قەدەغە کرن.

رەوشەنبیر و نڤیسکارێ کورد موسا ئانتەر، 29 سالان بەرێ د 20ێ ئیلۆنا سالا 1992یێ ل دیاربەکرێ ژ ئالیێ ژیتەمێ ڤە ھاتە کوشتن. ئیرۆ موسا ئانتەر، د سالڤەگەرا کوشتنا خوە دا ل تاخێ سەیرانتەپە یێ دیاربەکرێ ل جھێ بوویەرێ و ل سەر گۆرا خوەیا ل گوندێ ستیلیلێ سەر ب ناڤچەیا نسێبینێ یا پارێزگەھا مێردینێ، ژ لایێ مالبات و حەزکریێن خوە ڤە هاتە ب بیرئانین.

خەلاتێن “پێشبازیا رۆژنامەڤانان یا موسا ئانتەر و شەھیدێن چاپەمەنیا ئازاد” ژی ئاشکەرا بوون. خەلات ئیرۆ دێ د دەمژمێر 6ێ ئێڤاری ل “ناڤەندا چاندێ یا جەمیل جانداش یا شارەداریا ناڤچەیا شیشلی یا ستەنبۆلێ” هێنە بەلاڤکرن.

موسا ئانتەر سالا 192ێ ل گوندێ ستیلیلێ سەر ب ناڤچەیا نسێبینێ یا پارێزگەھا مێردینێ یا باکورێ کوردستانێ ژ دایک بوویە و د سالا 1944ێ دا لگەل عایشە ھالە زاپسو یا کەچا رەوشەنبیرێ کورد عەبدولرەحیم رەحمی یێ ھەکاری (زاپسو) زەوجی. رەحمی یێ ھەکاری ژی زاڤایێ مالباتا بەدرخانییان بوو. سێ زارۆکێن موسا و ھالە ئانتەر ب ناڤێ ئانتەر، رەخشان و دیجلە چێبوون.

موسا ئانتەر سالا 1943یێ د ئاڤاکرنا «دجلە تالەبە یوردو» دا جھ گرت و د ناڤبەرا سالێن 1960 – 1970یێ دا ل سەر رەوشا کوردان رۆژنامەیێن وەکە Dicle’nin Kaynagi, İleri Yurt دەرخستن. ھەروھا یەک ژ دامەزرێنەرێن ناڤەندا چاندێ یا مەزۆپۆتامیا و ئەنستیتویا کوردان ل ستەنبۆلێ بوو.

ژ بەر نڤیسا خوەیا ب ناڤێ قمل ھات دادگەھکرن، د ھەر سێ کۆدەتایێن لەشکەری یێن ل ترکیا پێک ھاتی دا، ژ بەر نڤیس و داخویانیێن خوە ھاتە گرتن. د 20ێ ئیلۆنا 1992یێ دا ل دیاربەکرێ ژ لایێ ھێزێن تاری یێن ژیتەمێ ڤە ھاتە کوشتن. پرتووکا وی یا ب ناڤێ “بیرئانینێن من” ژ لایێ نڤیسکارێ باشوورێ کوردستانێ محەمەد عەزەدین ڤە بۆ سۆرانی ھات وەرگەراندن.