کادرێ په‌كه‌كێ یاسین بولوت، ئانكو شوکری سه‌رحه‌د، ل سلێمانیێ هاتە کوشتن، د ساعەتێن دەستپێکێ یێن بوویەرێ دا، په‌كه‌كێ ئەڤ بوویەر ب دەولەتا ترک ڤە گرێدا و داخویانی دا کو دێ تۆلا وی هێته ڤەکرن، هێژان چ ئاگاهی نینن کو بوویەر ب راستی کێ کرییە.
شوکری سه‌رحه‌د کی یە و چما دەولەتا ترک وی بکەته ئارمانج؟
چیرۆکا ژیانا یاسین بولوت یێ ب کۆدناڤێ شوکری سه‌رحه‌د، وەک کادره‌كێ کەڤن دهێته به‌حس کرن و گەلەک «ژێدەرک» ژی وی وەک رێڤەبه‌رەکێ په‌كه‌كێ دده‌نه ناساندن، لێ بەلێ، ب لێکۆلینەکا پڕ کێم ژی، دەردکەڤیت هۆلێ کو شوکری سه‌رحه‌د نە رێڤەبەرە و نه ژی کارمەندەکێ ب باندۆرە.
شوکری سه‌رحه‌د، هەر چ قاس د ناڤا په‌كه‌كێ دا کەڤن ژی بیت، لێ چ جاران ئەرکێن ب باندۆر وەرنه‌گرتنە، ئه‌و وەک کەسایەتی ژی ژ ئالیێ په‌كه‌كێ ڤە گه‌له‌ك نه دهات پەژراندن، ژ بەر تەمەن و پرسگرێکێن وی یێن تەندورستیێ ئەو هەر ده‌م د سازیان دا ب جهـ دکرن، ئانكو نە د ناڤا شەر دا فەرماندار بوو و نەژی د وارێ رێخستنێ دا کەسەکێ بهێز بوو.
چ ئه‌گه‌ر نینن کو کەسەکی وه‌ها ب ئۆپەراسیۆنەکا تایبەتا دەولەتا ترک ببیته ئارمانج، وەکی دی، ل سلێمانیێ گەلەک رێڤەبەرێن پایەبلند یێن په‌كه‌كێ، په‌ژاک و په‌یه‌دێ هەنە، ژ بلی سازییان، هه‌روه‌ها ل سەر ناڤێ کۆنسەیا رێڤەبەر یا كه‌جه‌كێ و هەم ژی رێڤەبەرییا ژنان گەلەک کەسێن پایە بلند هەنە، ب تایبەتی، هەژمارەک پڕ زێدە یا كادرێ مەدیایی هه‌یه، ئەڤ کەسه هه‌موو، دەستێن خوە دهەژینن و دشێن ل سلێمانی سەره‌دانا فرۆشگەهـ و كافێیان ژی بکه‌ن، پرس ئه‌ڤه‌یه، دەما کو ئەو قاس ناڤێن گرنگ هەبن، ما کەسەکێ وەک شوکری سه‌رحه‌د ببیته ئارمانج، مانە تشتەکێ عه‌جێبه؟!.
هنده‌ك دەردۆرێن ناسیار ل سلێمانیێ ئیدیعا دکه‌ن کو ئه‌گه‌را کوشتنا شوکری سه‌رحه‌د نە سیاسی یە، بێ گومان دێ راستی دەرکەڤیته هۆلێ.
سیسته‌ما په‌كه‌كێ یا مفا وه‌رگرتنێ ژ مرییان
ناهێته قەبوول کرن پیرەمێرەکی 64 سالی ل ناڤا کۆلانێ بهێته کوشتن، بوویەر کێ و ب چ ئه‌گه‌ر کربیت ژی، قەد ناهێته قەبوول کرن، مافێ ژیانێ پیرۆزە، لێ سۆد وه‌رگرتن ژ جەنازه‌ی ب قاسی کوشتنێ کارەکی بێئەخلاقی یە.
دەما کو شوکری سەرحەد یێ ساخ، په‌كه‌كێ ئه‌و وه‌ك باره‌كێ گران بۆ خوه ددیت ونه‌دزانی دێ وی دانیته كو ده‌رێ، نها ژی په‌كه‌كە دخوازیت ژ مری سۆدێ وه‌ربگریت و ڤێ بوویەرێ بۆ خوە بکەته ئاموورەکی پرۆپاگاندایێ.
لێ بەلێ، راستی ئەڤە کو بەری کو شوکری سه‌رحه‌د ژیانا خوە ژ دەست بدەت، ئەو ژ بۆ رێڤەبەرییا په‌كه‌كێ د باره‌كێ گران بوو، نها ژی په‌كه‌كە هەول ددەت کو ل سەر جەنازه‌یێ شوکری سه‌رحه‌د سیاسەتێ بکەت.
یەکەمین تشتێ کو په‌كه‌كە دخوازیت بکەت ئەوە کو ب رێیا بوویەرا شوکری سه‌رحه‌د ژ یه‌نه‌كێ قه‌ره‌بوویێ وه‌ربگریت، په‌كه‌كە دخوازیت توهمەتەکا وه‌ها ل سەر یه‌نه‌كێ چێبکەت: «د دەما لاهورێ جەنگی دا ئەڤ بوویەره چێنه‌دبوون، ترکیە لاهور جەنگی ته‌سفییە کر، ڤان بوویەران ژی دەستپێکر».
لێ بەلێ، د دەما لاهور جەنگی دا، ئەندامێن هەری گرینگێن په‌كه‌كێ هاتن کوشتن.
دەزگەهێ راگاهاندنا په‌كه‌كێ رۆژنیۆزێ کو ل سلێمانیێ یه، ئاخفتنا لاهور جەنگی ئه‌وا د خیڤه‌تا تازیێ دا کری ژی خەلەت وه‌رگێرا، گۆتنا لاهور جەنگی ئه‌ڤه بوو: «ئەز هێزێن ئەولەکاریێ یێن کو کوژەر زوو دەستەسەر کرین پیرۆز دکه‌م»، لێ رۆژنیۆزێ وه‌سا وه‌رگێرا: «دڤێت هێزێن ئەولەکاریێ د زووترین دەم دا دۆزێ زەلال بکه‌ن».
ب ڤی رەنگی د چاڤێن کوردێن کو سۆرانیێ نزانن دا، خواستن لاهوری وەک کەسەکێ باش، لێ رێڤەبەرێن دی یێن یه‌نه‌كێ خراب بده‌نه ناساندن.
مام جەلال ل سه‌ر په‌كه‌كێ چ گۆتبوو؟
په‌كه‌كه ل دەستپێکێ و ئەڤ بوویەر ژ هەموو فه‌وزایا ل سلێمانیێ بەرپرسیارە، هێزا سەرەکی یا کو سلێمانیێ بەر ب فه‌وزایێ ڤە دبەت رێخستنا په‌كه‌كێ یە، سەرۆکێ بەرێ یێ یه‌نه‌كێ، رەحمەتی جەلال تالابانی، ل سالا 1998ێ گۆتبوو: «بۆ ده‌رێخستنا په‌كه‌كێ ژ سلێمانیێ چ یا پێدڤی بیت، دڤێت ئه‌م بكه‌ین، پێدڤی بیت ئەم دێ چەکی ژی ب کارئینین، ژ بەر کو جهێ په‌كه‌كە لێ بیت، چ کەس نه‌شێت ب ئارامی لێ بنڤیت».
رەحمەتی مام جەلال تشتێ دگۆت ب جهـ ئینا و ب رێكا هێزا لەشکەری و سیاسی په‌كه‌كە ژ سلێمانیێ دوو ئێخست، تشتێ کو دێ نوکە سلێمانیێ رحه‌ت و ئارام كه‌ت، دوورئێخستنا په‌كه‌كێ یە ژ نەڤەندا باژارێ سلێمانیێ، ژ بەر کو ئەو نە قانوونێ ناس دکەت و نه ژی ژ ئارامیێ حه‌ز دكه‌ت.
په‌كه‌كه تەڤگەرەكا فه‌وزایی یه، گەر هوون ل بوویەرا شوکری سه‌رحه‌د ژی بنێرن دێ بینن کو تەنێ په‌كه‌كە یا سۆدێ ژ بوویه‌رێ وه‌ردگریت.
