رێڤه‌به‌رێ كۆمپانییا مۆدێرنا: ساله‌كا دی كۆرۆنا نامینیت

رێڤه‌به‌رێ كۆمپانییا مۆدێرنا راگه‌هاند كو ڤیرۆسا كۆرۆنایێ ل گه‌ل زێده‌بوونا به‌رهه‌مئینانا ڤاكسینێ دێ د ناڤا ساله‌كێ دا خه‌لاس بیت و نامینیت.

ستیڤان بانسێل ژ رۆژنامه‌یا «Neue Zürcher Zeitung» یا سویسری گۆت: «د ده‌ما 6 مه‌هێن داوین دا‌، به‌رهه‌مئینانا ڤاكسینێ زێده‌ چالاك بوویه‌، واته‌ هه‌تا ناڤه‌راستا سالا 2022ێ، ڤاكسین دێ ب قاسی نفووسا جیهانێ به‌رده‌ست هه‌بیت.

رێڤه‌به‌رێ كۆمپانییا مۆدێرنا ته‌كه‌ز كر، یێن کو ڤاكسینێ نه‌ستینن ب خه‌ته‌ری تێن حه‌ساب كرن، ژ به‌ر كو ئه‌و دێ ره‌وشێ ئالۆز كه‌ن و گۆت: «ئه‌ز ژ وان را‌ دبێژم، بریار یا وه‌ یه‌، یان هوونێ ڤاكسینێ ستینن و زڤستانەکا خوەش دەرباس بکه‌ن، یان هوونێ نه‌ستینن و خەتەرەیا وە هەیە کو هوون نەخوەش ببن».

د بەرسڤا پرسەکێ دا گەلۆ ئەڤ دهێته‌ ڤێ واتەیێ کو د نیڤا دویەمین یا سالا بهێت دا رەوش نۆرمال ببیت، وی گۆت: «ژ ئیرۆ پێدا، ئەز تەخمین دکه‌م کو ئه‌ڤ یه‌ك دێ د ناڤ سالەکێ دا چێبیت».