ھات راگھاندن کو 22یێ ئیلۆنێ ل گرتیگەھا فەشفوویە یا تەھرانێ جوانێ کوردێ ب ناڤێ ئەمیرحسێن حاتەمی یێ 23 سالی یێ ژ ھەرێما سیروانێ یێ باژارێ ئیلاما رۆژھلاتێ کوردستانێ ب ئیشکەنجەیێ ھاتە کوشتن.
خزمێن ئەمیر حسێن ژ بۆ تۆرا مافێن مرۆڤان یا کوردستانێ گۆت، ئەمیر حسێن بەریا 10 رۆژان ژ بۆ وەرگرتنا ترۆمبێلا بابێ خوە چوویە ناڤەندەکا پۆلیسان یا ل تەھرانێ، لێ بەلێ ژ بەر سزایێ کو د دۆسیەیەکا بەرێ دا لێ ھاتیە برین ھاتیە گرتن و ئەو شاندیە گرتیگەھا فەشفویەیێ.
ھات دیارکرن کو ئەمیر حسێن ھەری داوی 21ێ ئیلۆنێ ب رێیا تەلەفۆنێ لگەل بابێ خوە دا ئاخڤتیە و گۆتیە وی کو ل گرتیگەھێ ئیشکەنجەیەکا گران لێ ھاتیە کرن و دێ وی بەنە نەخوەشخانەیێ.
پشتی ڤێ ئاگاھیێ مالبات چوویە نەخوەشخانەیێ ژ بۆ ئەمیر حسێن ببینن، لێ بەلێ رێ ب وان نەھاتیە داین و پشتی رۆژەکێ ژی ئاگاھیا مرنا ئەمیر حسێن دانە وان.
مالباتا ئەمیر حسێن پشتی کو ل بەر گرتیگەھا فەشفویەیێ ل ھەڤ جڤیا، جەنازە کورێ خوە وەرگرت و ژ بۆ ڤەشارتنێ جەنازە برە گوندێ لەرێنی یێ سیروانێ.
