وەزارەتا دەرڤە یا ئه‌مه‌ریكایێ راگه‌هاند کو ئەگەر ترکیە، سیسته‌ما S-400 ێ ژ رووسیایێ بکریت، دێ هێته جەزا کرن.
د مژارا سیستەما بەرەڤانییا ئاسمانی یا ب ناڤێ S-400 دا کو ترکیێ ژ رووسیایێ کرییە، ئالۆزییا ناڤبەرا ئه‌مه‌ریكا و ترکیێ بەردەوامە. ترکیە پێداگرە کو سیستەمێن نوو یێن S-400 بکریت و ئه‌مه‌ریكا ژی دبێژیت: ئەگەر ترکیە S-400 بکریت دێ جەزایێن نوو ل سەر هێنه سه‌پاندن.
یەک ژ بەردەڤکێن وەزارەتا دەرڤە یا ئه‌مه‌ریكایێ، بەری سەره‌دانا سەرۆکۆمارێ ترکیێ رەجەپ تایب ئاردۆگان بۆ رووسیایێ، ژ رۆیته‌رزێ را ئاخڤی و دەربارێ کرینا چەکێن رووسی دا هشیاریەکا توند دا ترکیێ.
بەردەڤکێ وەزارەتا دەرڤە یا ئه‌مه‌ریكایێ گۆت:«ئەگەر ترکیە ژ رووسیایێ چەکان بکریت، ژ بلی جەزایێن CAATSA کو د کانوونا 2020ێ دا کەتبوون د وارێ جیبجیکرنێ دا، دێ جەزایێن نوو ل سەر ترکیێ هێنه فەرزکرن، ئەم هشیاریێ دده‌ینه ترکیێ کو ده‌ست ژ S-400 به‌رده‌ت و سیستەمەکا نوو یا چەکێن رووسی نه‌كریت».
بریارە ئەردۆگان، 29ێ ئیلۆنێ سەره‌دانا رووسیایێ بکەت و ل باژارێ سۆچیێ ل گەل سەرۆکێ رووسیایێ ڤلادیمێر پۆتن كۆمببیت، د هەڤدیتنان دا دێ مژارا ئدلبێ و تێکلیێن دوئالی هێنه گۆتووبێژ کرن.
