ھات ئیدیعاکرن کو سەرۆک کۆمارێ ترکیا و سەرۆکێ گشتی یێ ئاکەپێ رەجەب تەییب ئەردۆگان پشتی سەردانا خوەیا دیاربەکرێ یا مەھا تیرمەھێ راپرسییەک دایە چێکرن و ل گۆری ئەنجامێن وێ راپرسییێ ژی ئامادەکاریا پێشکەشکرنا پاکێجەکا نوویا چارەسەریێ ئانکو “پرسا کورد” دکەت.
ل گۆری وان نهێنیێن پشت پەردێ یێن ئاکەپێ کو ژ ئالیێ رۆژنامەڤانێ ترک تونجای مۆلاڤەسۆگلو ڤە ھاتنە پارڤەکرن، د ھلبژارتنێن بهێت یێن 2023یێ دا سەرکەفتنا تفاقا ئاکەپێ و مەھەپێ مومکن خوەیا ناکەت و ئەردۆگان ژی ھای ژ ڤێ ھەیە و لەوما پشتی 2018ێ جارا یەکەم سەردانا دیاربەکرێ کریە.
رۆژنامەڤانێ ترک گۆتیە، ئەردۆگان پشتی وێ سەردانێ راپرسی دایە چێکرن و ھێڤی ژ بۆ وی چێبوویە کو ب مژارا پرۆسەیەکا نوویا چارەسەریێ بکاریت دەنگێن پارتیا خوە بلند بکەت.
ل گۆری نووچەیێ گۆتنێن ئەردۆگان یێن، “مە چارەسەری بۆ پرسا کورد دخواست، لێ ھەدەپێ/پەکەکێ ئەو ھەلوەشاند” د ناڤا گەل دا بەرسڤا خوە دیتیە و ژ بەر وێ ژی ئامادەکاریا پاکێجەکا نوویا چارەسەریێ دایە دەستپێکرن.
