رێخستنا په‌كه‌كێ ئیرۆ جاره‌كه دن گه‌لێ شه‌نگالێ وه‌كه ئامووره‌كێ پرۆباگندایێ و مه‌رتال ب كار ئانین و ژ بۆی جی ب جی كرنا پیلانێن خوه، ئه‌و ب دارێ زۆرێ ل سه‌ر جادده‌یان به‌لاڤ كرن.
پارتییا ده‌مۆكرات یا كوردستانێ، دوهی رۆژا ئینی راگه‌هاند كو ئه‌و دێ ئیرۆ رۆژا شه‌مبی 2/10/2021ێ كارێن خوه یێن هلبژارتنێن پارلمه‌نتۆیا ئیراقێ، ل شه‌نگالێ ده‌ست پێ بكه‌ن، ژ بۆی ڤێ ژی په‌كه‌كێ ئیرۆ لڤ و ته‌ڤگه‌رێن خوه ده‌ست پێ كرن و گه‌لێ شه‌نگالێ ژ بۆی پێشی گرتنا ل په‌ده‌كێ، ب دارێ زۆرێ ده‌رخستنه سه‌ر جادده‌یان.
رێخستنا په‌كه‌كێ ئیرۆ، هه‌ژماره‌كه وه‌لاتیێن شه‌نگالێ كو پرانی ژێ ژن و زارۆكن، وه‌كه مه‌رتال ب كار ئانینه و ئه‌و ب دارێ زۆرێ ده‌رخستنه سه‌ر ریێن سه‌ره‌كی یێن سنوونێ و شه‌نگالێ و دخوازیت ب رێیا وان، كارێن په‌ده‌كێ یێن گرێدای هلبژارتنێن پارلمه‌نتۆیا ئیراقێ ئاسته‌نگ بكه‌ت.
په‌كه‌كه نها خوه ب خوه‌دییا شه‌نگالێ دزانیت، گه‌لێ شه‌نگالێ ژی پڕ ژ ره‌فتار و مایینا وان یا ب زوور عاجزن، ژ به‌ر كو ب سه‌ده‌ما په‌كه‌كێ هه‌تا نها 80% یا وه‌لاتیێن شه‌نگالێ د كامپان دا ئاواره و كۆچبه‌رن.
حكوومه‌تا باشوورێ كوردستانێ و حكوومه‌تا ئیراقێ ل سالا رابووری په‌یمانه‌ك ژ بۆ ئاسایی كرنا ره‌وشا شه‌نگالێ و ڤه‌گه‌را ئاواره‌یێن وێ ئیمزا كر، لێ به‌لێ په‌كه‌كێ نه‌هشت ئه‌و په‌یمان بهێته جی ب جی كرن، سه‌ده‌ما كو په‌كه‌كێ نه‌هشتی په‌یمانا شه‌نگالێ بهێته جی ب جی كرن ئه‌وه كو ئه‌ڤ رێخستن خوه ب خوه‌دییا شه‌نگالێ دزانیت و ناخوازیت ئاواره‌یێن شه‌نگالێ ڤه‌گه‌رن وارێ خوه.
