کۆمیتەیا بلند یا ھلبژارتنان یا پەدەکێ ب توندی ل ھەمبەر رێگریکرنا چەکدارێن پەکەکێ ل کاندیدێن پەدەکێ ل شنگالێ نەرازیبوون نیشان دا و بانگ ل حکوومەتا ئیراقێ کر کو ڤێ یەکێ چارەسەر بکەت.
دوھی دەما کاندید و کادرۆ و بەرپرس و ئەندامێن پەدەکێ دخواستن بۆ خەباتێن ھلبژارتنێن گشتی یێن ئیراقێ دەرباسی دەڤەرا شنگالێ ببن، چەکدارێن پەکەکێ رێیا وان گرتن و نەھیشتن دەرباس ببن.
کۆمیتەیا بلند یا ھلبژارتنان یا ئیراقێ ل سەر ڤێ رەوشێ داخویانیەک بەلاڤ کر و ب توندی نەرازیبوون نیشان دا.
د داخویانیێ دە ھاتیە گۆتن، مخابن ھێزەکا نە رەوا و نە ئیراقی دکاریت ب ھێسانی پێشیا کاندیدێن پەدەکێ بگریت و نەھێلیت ژیانا خەلکێ دەڤەرا شنگالێ نۆرمال ببیت.
کۆمیتەیا ھلبژارتنان یا پەدەکێ حکوومەتا ئیراقێ ب خەمساریێ تۆھمەتبار کریە و گۆتیە، ب راستی مرۆڤ شاش دمینیت ژ ڤێ ھەلوەستا حکوومەتا ئیراقێ.
کۆمیتەیا ھلبژارتنان یا پەدەکێ بانگ ل حکوومەتا ئیراقێ و کۆمیسیۆنا ھلبژارتنان یا ئیراقێ ژی کریە دەملدەست رێگریێن پەکەکێ و بنپێکرنێن وان ل دەڤەرا شنگالێ و پارێزگەھا نەینەوا بدەنە سەکناندن و سەرپێچیکاران ژی سزا بدن و کەشەکێ موناسب بۆ خەباتێن ھلبژارتنان بخولقینن. ئێدی پەدەکە ڤێ یەکێ قەبوول ناکەت.
