ئێزدیێن ل عه‌فرینێ راستی پاقژکرنا ئەتنیکی هاتنه
ل عه‌فرینێ د ئەنجاما ئێریشا ترکیێ و گرووپێن چەکدار دا، کوردێن ئێزدی زیانا هەری مەزن دیتنە، بەری ئێرشا عه‌فرینێ نێزیکی 25 هەزار کوردێن ئێزدی لێ هەبوون، لێ نها هەژمارا وان ژ 5 هەزاران کێمترە، رۆژنامەڤانێ فرانسی سیليڤان مێغكادیر ژ رووداوێ را گۆت: «ل عه‌فرینێ پاقژکرنا ئەتنیکی و نه‌ژادپەرەستی ل دژی کوردێن ئێزدی هاتییە کرن».
د دیمەنێن کو ژ ناڤ گوندێ قیبارێ کو گوندەکێ کوردێن ئێزدی یێ هەرێما عه‌فرینێ یه، خوه‌یا دبیت كو د ئێرشا ڤان گرووپێن چەکدار و ئارتێشا ترکیێ دا ل سەر هەرێما عه‌فرینێ، کوردێن ئێزدی باجا هەری گران دان، نە تەنێ مال و ملک، مەزارگەهـ و پەرەستگەهێن وان، لێ هەتا گۆرستانێن وان ژی ژ دەستێ چەکداران رزگار نەبوون.
ئه‌ڤ رۆژنامەڤانێ فرانسی كو پسپۆرێ رێخستنێن رادیکاله ژی و وی ب خوە سەردانا عه‌فرینێ کربوو، د دەربارێ کوردێن ئێزدی یێن عه‌فرینێ دا گۆت: «وەکی باش تێ زانین کو عه‌فرین هەرێمەکه کو گەلەک پێکهاتە تێدا ب هەڤرا دژین، کوردێن مسلمان، هنەک عەرەب، لێ گەلەک ئێزدی لێ هەبوون، کو ژیانەکە وانا نەریتی هەبوو، گەلەک پەرەستگەهـ و جهێن رووحانی یێن وان بێن گرنگ ل عه‌فرینێ هەبوون کو من ب خوە ژی سەردانا پەرەسەگەهەکا وان یا پیرۆز ل عه‌فرینێ کربوو».
هه‌روه‌ها گۆت: «دەما کو عه‌فرین کۆنترۆل کرين، ئەڤ ناڤچە ل سەر دەستێ سەرباز و چەتەیێن گرێدایی ئارتێشا ترکیێ راستی زەرەر و زیانێ هات و ئەڤ یەک بەلگەکرییە، راپۆرت هەنە، ئەم دکارن بەحسا پاقژکرنەکا ئەتنیکی و رەکزپەرەستیێ ل دژی ڤێ پێکهاتەیێ بکن، ژ بەر کو ئەو ژ ئالیێ رادیکالێن ئیسلامیست ڤە وەکی گاور هاتن حەسباندن».
بەریا داگیرکرنا عه‌فرینێ، نێزی 25 هەزار کوردێن ئێزدی ل هەرێما عه‌فرینێ بوون، ئەو ل ناڤ باژارێ عه‌فرینێ و 22 گوندێن هەرێمێ نشتەجیبوون. نها کێمتری 5 هەزار کوردێن ئێزدی مانە و هن گوندێن وان وەکی بافەلوونێ ب تەمامی ژ ئێزدیان هاتییە ڤالاکرن و رێ ژ بۆ ڤەگەرا وان نایێ داین.
