ئارتێشا تركیێ خاله‌كا دن یا سه‌ربازی ل چیایێ زاویه‌یێ یێ ل باشوورێ ئدلبێ ئاڤا كر، ئەڤ یەک د دەمەکێ دا یە کو رووسیایێ ڤێ هەیاما داوی، ئێرشێن ئاسمانی یێن ل هەرێما ئدلبێ زێدە کرنە.
ل گۆر چاڤکانیێن سەربازییێن ئۆپۆزسیۆنا سووریێ، رۆژا یەکشەمێ 3ێ جۆتمەها 2021ێ، هێزێن ترکیێ خالەکە سەربازی ل باژارۆکێ بینین سەر ب چیایێ زاویەیێ ڤه ل باشوورێ ئدلبێ ئاڤا کرن.
ل گۆر هەمان چاڤکانییان، نها 13 هەزار سەربازێن ترکیێ ل گەل 9 هەزار ئۆتۆمۆبیلێن سەربازی ل 70 خالێن سەربازی ل باکورێ رۆژئاڤایێ سووریێ هه‌نه.
ئەڤ یەک د دەمەکێ دەیە کو رووسیایێ ڤێ هەیاما داوی ئێرشێن ئاسمانی ێن ل هەرێما ئدلبێ زێدە کرنە.
سەرۆکێ رووسیایێ ڤلادیمێر پوتین و سەرۆکۆمارێ ترکیێ رەجەپ تایب ئەردۆگان رۆژا 29ێ مەها رابووری ل سۆچی یا رووسیایێ جڤینەک پێک ئانیبوون و مژارا سەرەکی یا جڤینێ رەوشا ئدلبێ بوو.
ل هەرێما ئدلبێ ژبلی سەربازێن ترکیێ هەژمارەکە زێدە یا گرووپێن چەکدار هەنە کو ترکیە پشتەڤانییا وان دکە و گرووپا سەرەکی ژی «هەیئەت ته‌حریر ئه‌ل شامە» «ئەل نوسرا» یا بەرێ، كو ژ ئالیێ هەژمارەکە زێدە یا وەلاتان ڤە وەک گرووپەکە «تەرۆریست» تێ ب ناڤ کرن.
ترکیە و رووسیایێ 5ێ ئادارا 2020ان ل سەر راوەستاندنا شەرێ ل ئدلبێ ل هەڤ کربوون، لێ پشتی 18 مەهان د سەر پەیمانێ را کو ل مۆسکۆیێ هاتبوو ئیمزا کرن هەردو ئالی ل سەر پێکنەئانینا شەرتێن پەیمانێ هەڤدو تاوانبار دکه‌ن.
