نوونەرا تایبەتا سەکرەتەرێ گشتی یێ نەتەوه‌یێن یه‌كبوویی ل ئیراقێ، رێگرتنا ل کاندیدێن په‌ده‌كێ ل شنگالێ ژ ئالیێ په‌كه‌كێ ڤە شەرمەزار کر و راگه‌هاند، هەموو کاندید ئازادن ل هەر جهەکی بانگەشەیا خوە بکه‌ن.
نوونەرا تایبەتا سەکرەتەرێ گشتی یێ نەتەوه‌یێن یه‌كبوویی ل ئیراقێ جینین پلاسخرت ل بەغدایێ د کۆنفەرانسەکێ رۆژنامەڤانی دا دەربارێ رێگرتنا ل کاندیدێن په‌ده‌كێ ژ ئالیێ په‌كه‌كێ ڤە گۆت: «ئەز ئاگاهداری وێ بوویەرا ل شنگالێ مە، هەموو پارتی ئازادن بانگەشەیا هلبژارتنێ بکه‌ن، دڤێت دەستهلاتێن ل هەولێر و بەغدایێ کار ژ بۆ ئاساییکرنا رەوشێ بکه‌ن.
هه‌روه‌ها گۆت: «دزانم بانگەشەکرن ل ئیراقێ نە هێسانە، لێ دوبارە دکه‌م کو هەموو کاندید ئازادن ل کو دەرێ بیت بانگەشەیا خوە بکه‌ن، ئەز وێ بوویەرا رێگرتنێ شەرمەزار دکه‌م».
دەربارێ هەولێن سەختەکارییا د هلبژارتنێن بهێن یێت ئیراقێ دا، پلاسخارت گۆت: «هەموو ئەرک و ئارمانجا مە ئەوە، رێگریێ ل سەختەکاریێ بکه‌ین و ب تایبەت ل کەرکووکێ، چاڤدێرێن نەتەوه‌یێن یه‌كبوویی هەر هەولەکێ ددن ژ بۆ سەرخستنا پرۆسەیا دەنگدانێ، هەروه‌ها چاڤدێرییا هەموو ئالیاین دکه‌ن ژ بۆ دوور بن ژ گەفخوارنا ل کاندید و دەنگداران».
رۆژا 2ێ جۆتمەهێ، هەژمارەک ژ چەکدارێن په‌كه‌كێ پێشی ل کاندیدێن په‌ده‌كێ گرتن و رێ نەدان ئەو بچن شنگالێ تا کو بانگەشەیا هلبژارتنان بكه‌ن.
