پارتیا دەمۆکراتا کوردستانێ (پەدەکێ) ل سەر گەف و رێگرتنا ل کاندیدێن پەدەکێ ل شنگالێ ژ ئالیێ چەکدارێن سەر ب پەکەکێ ڤە، دۆز ل کۆمیسیۆنا بلندا سەربخوە یا ھلبژارتنان یا ئیراقێ ڤەکر. پەدەکێ داخواز کر کو چارەسەریەک ژ بۆ ئاوارەیێن شنگالێ بهێتە دیتن، کو نکارن ڤەگەرن جھ و وارێن خوە، دا کو د ڤێ ھلبژارتنێ دا دەنگا بدەن.
کۆمیسیۆنا ھلبژارتنان یا ئیراقێ ژ ئالیێ پەدەکێ ڤە ھات ئاگاھدارکرن کو رۆژا شەمبیێ 2یێ جۆتمەھا 2021ێ گەف و رێگری ل سێ کاندیدێن پەدەکێ ھاتیە کرن کو بچنە ناڤچەیا شنگالێ.
پارتیا دەمۆکراتا کوردستانێ دەستنیشان کر کو ھەژمارەک چەکدار ب چەکێن سڤک و ناڤین، ل شنگالێ رێگری و گەف ل نامزەدێن پەدەکێ مەحما خەلیل، ڤیان دەخیل و ماجید خەلەف کرنە، کو دخواستن بچنە سەر گۆرا شەرفەدین و خەلکێ شنگالێ و ئالیگرێن پەدەکێ ژی ل بەندا بەربژێران بوون.
ھەر چقاس فەرماندارێ سەربازی یێ رۆژئاڤایێ دیجلەیێ لگەل وان سەربازان دانووستاندن کرن، دا کو رێ بدەن نامزەدێن پەدەکێ بچنە شنگالێ و بانگەشەیا خوەیا ھلبژارتنان ل وێ ناڤچەیێ برێڤە ببەن، لێ وان چەکداران رەد کر کو بھێلن بەربژێر بچنە شنگالێ، ژ بەر ڤێ یەکێ کاندیدێن پەدەکێ ڤەگەریان دوھۆکێ.
پەدەکێ د سکالایا خوە دا ئاشکەرا کریە کو ئەڤ گەف و رێگرتن، بەرەڤاژی دەستوورا ئیراقێ و یاسایێن ھلبژارتنانە، کو نابیت رێگری ل چ کاندیدەکەکێ بهێتە کرن د بانگەشەیێ دا، لەوما داخواز کریە کو رێکارێن یاسایی ل ھەمبەر بنپێکەران بهێنە جێبەجێکرن و دەربارێ وان دا لێپرسین بهێتە دەستپێکرن.
پارتیا دەمۆکراتا کوردستانێ دەستنیشان کریە کو دڤێت چار بنکەیێن دەنگدانێ ژ بۆ ئاوارەیێن شنگالێ یێن ل ھەولێر و دوھۆکێ بهێنە ڤەکرن، کو دەنگدەرێن شنگالێ نکارن بچنە جھ و وارێن خوە.
