زماندرێژێن ناڤا مەدیایێ و ڵالێن ناڤا په‌رله‌مانێ ئیراقێ دا
یەک ژ دەزگەهێن رێپێدایی ژ بۆی چاڤدێریکرنا کارێن په‌رله‌مانێ ئیراقێ، ناڤێ وان ئەندامێن په‌رله‌مانێ ئیراقێ ئاشكه‌را دکەت کو کێمترین موداخەلە و ئاخفتن د كۆمبوونێن په‌رله‌مانی دا هەبووینە.
ل گۆری راپۆرتا دەزگەهێ «مەدارک» کو ل داوییا تەڤ خۆلێن په‌رله‌مانی به‌لاڤ دكه‌ت و هەتا رۆژا 7/10/2021ێ، هه‌موو دانەیێن كۆمبوونان ل جەم خوە ئارشیڤ کرینە، «31» ئەندامێن په‌رله‌مانێ ئیراقی ب تنێ یەک جارێ بەشداری دانوستاندنێن ناڤا په‌رله‌مانی دا بووینە.
زێده‌باری ڤێ یەکێ هات ئاشكه‌را کرن کو «57» ئەندامێن په‌رله‌مانێ ئیراقێ خۆ یەک جار ژی د كۆمبوونێ په‌رله‌مانێ ئیراقێ دا نه‌ئاخفتینه، د ناڤا وان دا ژی هنده‌ك په‌رله‌مانتارێن کورد یێن ژ پارتیێن جودا جودا هه‌نه.
یاکو بالا مرۆڤی دكێشیت ئەڤەیه کو بەشەک ژ وان په‌رله‌مانتارێن کورد کو ب چ ره‌نگان یان بەشداری دانوستاندنێن د ناڤا په‌رله‌مانێ ئیراقێ دا نەبووینە یان ژی جاره‌كێ ب تنێ بەشداری كرییه و وێ جارێ ژی گه‌له‌ك کێم ئاخفتینە و ب چ ئاوایان بەرگری ل مافێن گەلێ کورد نەکرینە، لێ بەرەڤاژی ڤێ یەکی د مەدیایێ دا پتر ژ هەر کەسەکی ئاخفتینە و خوە وەک وه‌لاتپارێز نیشان داینە، د ناڤا وان دا هەر یەک ژ «جەمال کۆچەر، رێبوار کەریم مەحموود، سەرکەوت شەمسەدین، بلیسە جەبار فەرمان و عومەر رێکانی».
هنده‌ك ژ ڤان په‌رله‌مانتارێن کورد ئەون کو رۆژانە ل سەر ئەکرانێن TV، رووپەلێن رۆژنامەیان و سۆشیال مەدیایێ دا دەردکەڤن و رێ ب چ کوسەکی دی ژی ناده‌ن وان رەخنە بکه‌ن و خوە وەک پارێزڤانێن کوردستانێ دده‌نه ناساندن، لێ بەلێ ئەڤ راپۆرته خوەیا دکەت کو ئەڤ کەس ب تنێ ژ بۆ بەرژەوەندیێن خوە یێن شەخسی هەول دده‌ن و ل گۆری وان بەرژەوەندییان تەڤ دگەرن و ئاخفتنێ دکه‌ن.
هنده‌ك ژ ڤان په‌رله‌مانتارێ کورد یێن د ناڤا په‌رله‌مانێ ئیراقێ دا وەک كۆره و ڵالان تەڤ دگەرن، رۆژ ناچیت کو د مەدیایێ دا هێرشی سەر پیرۆزیێن کوردستانێ نەکه‌ن، رۆژ ناچیت سەرۆک و رێبەر و دەستهلاتدارێن کوردان رەخنە نەکه‌ن و خوە وەک دلسۆزێن گەل نیشان نەده‌ن، لێ چ جاران مە نەدیت و مە نەبهیست ب یەک پەیڤ ژی حکوومەت، په‌رله‌مان و رێبەر و دەستهلادارێن بەغدایێ رەخنە بکه‌ن، ئەڤ یەک ژی زەلال دکەت کو ئەڤ کەسه خوە فرۆشن و تنێ ب دووڤ بەرژەوەندیێن خوە کەتینە و بەرژەوەندیێن نەتەوی پشت گوهکرینە.
د راپۆرتێ دا هەروەها هاتییە دیار کرن کو په‌رله‌مانتار «رێبوار هادی عەبدولرەحمان» د ناڤا په‌رله‌مانتارێن کورد دا پتر ژ هەموویان موداخەلە د دانوستاندنێن د ناڤا په‌رله‌مانێ دا کرییە، «ڤیان سەبری» د ناڤا په‌رله‌مانتارێن ژن یێن کورد دا پتر ژ هەموویان موداخەلە کرینە، هه‌روه‌ها «بەیار تاهر دۆسکی» پتر ژ هەموو په‌رله‌مانتارێن کورد بەشداری د د دانانا پرۆژە قانوونان دا کرییە، د هه‌مان ده‌مێ دا ژ هه‌موویان كێمتر د مه‌دیایێ دا ده‌ركه‌تییه.
