ب ڤیدیۆ – ئاساییشا په‌یه‌دێ خه‌لك ب زۆری برنه ده‌ریێ سێمالكا
ل رۆژئاڤایێ کوردستانێ دەما چەند رۆژانە ئاساییشا پەیەدێ ب دارێ زۆرێ ولاتیێن کورد یێن ل گوندێن سەر سینۆرێ باشوورێ کوردستانێ دەرتێخیت کۆلانان و وان نەچار دکەن ل دژی ڤەگەرا پێشمەرگە و په‌یمانا شنگالێ درویشمان باڤێژن.
چاڤکانیێن پێگەها «دارکا مازی» ل رۆژئاڤایێ کوردستانێ ئه‌شكه‌ره کر، ژ 5/10/2021ێ هەیا ئیرۆ، رۆژانە ئاساییشا پەیەدێ خەلکێ گوندەوارێن سەر سینۆر دەرتێخن کۆلانان و وان نەچار دکەن درویشمێن نه‌شرین ل دژی هێزێن پێشمه‌رگه‌هان و حكوومه‌تا باشوورێ كوردستانێ باڤێژن.
هه‌روه‌ها دیار كر، داوی جار ئاساییشا په‌یه‌دێ خه‌لكێ گوندێن سینۆری ب دارێ زۆرێ ل ئالێ ده‌ریێ سێمالكا یێ سینۆری كۆم كرن و سلۆگان ل دژی حكوومه‌تا باشوورێ كوردستانێ ب وان دان گۆتن.
ده‌ست نیشان كر، پەیەدە دخوازیت ڤان چالاکیان بدەتە پال ئەنجوومەنا مالباتێن شەهیدان، لێ بەلێ د ئەساس دا پەیەدە ب خوە و ب فەرمانا قەندیلێ ڤی کاری ئەنجام ددەت.
چاڤکانیێن «دارکا مازی» ل رۆژئاڤایێ کوردستانێ هەروەها ئه‌شکەره کر، ئاساییشا پەیەدی ب خەلکێ رادگهینیت کو پێشمەرگە چەتەیێن ترکیێ نە و ل گۆری ئەجێندایێن ترکیێ تەڤ دگەرن، لێ ژ بەر کو گەلێ کورد پێشمەرگەهان باش ناس دکەت و دزانیت پێشمەرگە ژ بۆی ئازادییا کوردستانێ خەباتێ دکەت زوو ب زوو ل په‌ی داخوازییا ئاساییشا په‌یه‌دێ ناچیت، لەوما پەیەدە ب گڤاش و تەهدیدکرن و فێلبازییان وان نەچار دکەت دەرکەڤنە کۆلانان و خوەپێشاندانا ساز بکەن.
یەک ژ شێنیێن گوندێن سینۆری یێن رۆژئاڤایێ کوردستانێ راگهاند: «ئەم ژ دەستهلاتا پەیەدێ باوەر ناکن، لێ بەلێ ژ بۆی پاراستنا ژیانا خوە و زارۆیێن خوە ژ زۆر و ستەما وان، ئەم نەچار دمینین دەرکەڤن کۆلانان، تەڤی کو هەژمارا مە نە ئەوقاس زێدەنە لێ یێن دچن ژی ژ نەچاری و ژبەر گەفێن چەکدارێن پەیەدێ دچن و سلۆگانان ل دژی پێشمەرگە بلند دکن».
