دەزگەھا ھلبژارتنان یا پەدەکێ راگھاند، وان ب 28 سکالایان داخواز ژ کۆمیسیۆنا ھلبژارتنان یا ئیراقێ کریە سەبەبا جوداھیا ناڤبەرا ئەنجامێن وان و ئەنجامێن کۆمیسیۆنێ دا بهێنە ئاشکەراکرن.
بەرپرسێ بەشا یاسایی ل دەزگەھا ھلبژارتنانیا پەدەکێ، ھەوار محەمەد راگھاند، ئەم دێ ئیرۆ 28 سکالایان ل کۆمیسیۆنا ھلبژارتنان یا ئیراقێ تۆمار کەین ل سەر ئەنجامێن ھلبژارتنان. بەشەک ژ وان سکالایان ل سەر ئەنجامێن ھلبژارتنان ل پارێزگەھا سلێمانیێ نە. ئەو دەنگێن کو مە ل وێ دەڤەرێ ب دەست خستین لگەل ئەنجامێن کو کۆمیسیۆنێ راگھاندینە، جیاوازن. ژ بەر وێ ژی ئەم دخوازین سەبەبا ڤێ یەکێ بزانین.
ھەوار محەمەد ھەر وەھا گۆت، ئەم دێ ل پارێزگەھێن کەرکووک، حەلەبچە و نەینەوا ژی سکالایان تۆمار کەین.
ب گۆتنا وی بەرپرسێ پەدەکێ، ئەگەر سکالایێن وان بێنە قەبوولکرن دێ ھەژمارا کورسیان زێدە بن.
ل گۆری ئەنجامێن دەستپێکێ یێن ھلبژارتنێن گشتی یێن ئیراقێ، پەدەکێ 32 کورسیێن پارلەمەنتۆیا ئیراقێ مسۆگەر کرینە.
