هەژمارا کورسیێن په‌ده‌كێ زێدە بوو
کۆمسیۆنا بلند یا هه‌لبژارتنان یا ئیراقێ درەنگێ شەڤا بووری ئەنجامێن هەژمارتنا ب دەستان یا هەژمارەک ناڤەندێن دەنگدانێ ئاشکەرە کرن و کورسیەکا دن یا په‌ده‌كێ زێدە بوو.
ل گۆری ئەنجامان، کاندیدێ په‌ده‌كێ ل زاخۆ عەبدولواحد ئەحمەد بسەرکەت و په‌ده‌كێ هەژمارا کورسیێن خوە ل پارێزگەها دهۆکێ ژ 8 کورسیان کرن 9 کورسی.
ل گۆر ئامارێن کۆمسیۆنێ بەلاڤ کرنە، پشتی دەنگ ب دەستان هاتنە هەژمارتن، دیار بوو کو کاندیدێ په‌ده‌كێ عەبدولواحد ئەحمەد 20 هەزار و 348 دەنگ ئانینە و ب ڤێ یەکێ کەت پێش کاندیدێ یەکگرتوو عومەر کۆچەر.
ب ڤێ یەکێ، هەژمارا کورسیێن په‌ده‌كێ د ئەنجوومەنا نوونەران یا ئیراقێ دا، د 32 کورسییان بوون 33 کورسی.
ئەڤ د دەمەکێ دا یە بەردەڤکا کۆمسیۆنا بلندا هلبژارتنان یا ئیراقێ جومانە ئەل-خەلای راگه‌هاند، ئەنجامێن داویێ یێن هه‌لبژارتنان، پشتی 20 رۆژێن دن دێ هێنه راگه‌هاندن و ئەگەر هەیە گوهارتن د ئەنجامێن دەستپێکی یێن هه‌لبژارتنان دا چێببن.
ل گۆر ئەنجامان ژی، کورسیەکا تەڤگەرا حیکمە، 3 کورسیێن لیستا تشرین، 4 کورسیێن هەڤپەیمانییا فه‌تح و 5 کورسیێن دەولەتا یاسا زێدە بوون، ل هەمبەر ژی، 3 کورسیێن تەڤگەرا سەدرێ کێم بوون و ژ 73 کورسیان، بوون 70 کورسی.
پێشتر سەرۆکێ دەستەیا کۆمیسیاران یا کۆمیسیۆنا بلندا سەربخوە یا هه‌لبژارتنان ل ئیراقێ خەلیل عەدنان خەلەف راگه‌هاندبوو، ئەوێن ئەنجاما هەژمارتنا دەستان یا 8547 ناڤەندێن دەنگدانێ یێن ل 5 پارێزگەهان ئاشکەرە بکه‌ن کو ب تیرووپشک هاتنە دەست نیشان کرن.
