کۆمپانیا فەیسبووکێ لیستەیا کەساتی و رێخستنێن “مەترسیدار” کو هندەک کەساتیێن کورد ژی د ناڤ دا جی دگرن پارڤەکر، د ڤێ لیستەیێ دا هەر یە ژ: «عەڤدلا ئۆجالان، ئیسماعیل سووسکەیی، باهۆز ئەردال، دووران کالکان، مەزلۆم دۆگان، موراد کارایلان و ساکینا جانسز» جی دگرن.
د لیستەیا کۆمپانیا فەیسبووکێ دا ناڤێن نیزی 4 هەزار کەساتی و رێخستنان تێدانە کو ل سەر وان نڤیساندن و بانگەشەکرن ژ بۆ وان قەدەغەیە، ئەڤ لیستە ل سەر هندەک گرووپان هاتیە پارڤەکرن کو «توندوتیژی، تاوان، تەرۆر، بزاڤێن جڤاکی یێن چەکدار، رێخستنێن رادیکال» ب خوە ڤە دگریت و ل سەر سێ لیستەیان هاتینە پارڤەکرن.
ل گۆر قانوونێن فەیسبووکێ هەر کەس کو بانگەشەیێ ژ بۆی ڤان کەس و رێخستنان بکەت، یان نڤیسێن وان دێ هێنە ژێبرن یان ژی حەسابا وان یا فەیسبووکێ دێ هێتە پووچکرن.
د ناڤا ڤێ لیستەیێ دا ناڤێ ئیسماعیل سووسەیی، گۆتاربێژێ بەرێ یێ مزگەفتەکێ ل تاخی ئاشتی یێ هەولێری کو ل سالا 2018ێ ب تاوانا هەبوونا پەیوەندیان لگەل داعشێ دا هاتبوو گرتن هەیە.
هەر وەها هندەک کەساتی و رێخستنێن سەر ب پەکەکێ کو د فەیسبووکێ دا هاتنە بلۆک کرن هەنە و رێ ب وان نایێ دایین کار و چالاکیێن خوە د حەسابێن خوە یێن فەیسبووکێ دا پارڤە بکەن، د ناڤا وان دا گەریلا تی ڤی، کۆما جڤاکێن کوردستانێ، پارتیا ژیانا ئازادا کوردستانێ، کۆمێن جوانان، پارتیا کارکارکەرێن کوردستانێ، عەڤدلا ئۆجالان، باهۆز ئەردال، دووران کالکان، مەزلۆم دۆگان، موراد کارایلان و ساکینە جانسز ژی جی دگرن.
