هات راگهاندن کو چەکدارێن پەکەکێ ل سینۆرێ سەیرانبەنێ رۆژانە باجێ ژ خەلکێ وێ ناڤچەیێ دستینن و سڤکاتیێ ب وان دکەن.
چاڤکانیێن پێگەها دارکا مازی ل باشوورێ کوردستانێ راگهاند، چەکدارێن پەکەکێ ل خالا گۆمرکی یا سەیرانبەنێ ل سینۆرێ باژارۆکێ پێنجوین یا سەر ب پارێزگەها سلێمانیێ، رۆژانە پارەیەکێ زێدە وەکو باج ژ کارکەر و کاسبکارێن ڤی سینۆری دستینن، ئەڤ یەک د دەمەکێ دایە کو ئەڤ خەلکە ب رێیا ڤی دەریێ سینۆری خوە و مالباتێن خوە خوەدی دکەن.
چاڤکانیێن مە هەر وەها ئاشکەرا کر، چەکدارێن پەکەکێ ل رۆژا 25/8/2021ێ، دەست ب سەر سێ ترۆمبێلێن بارهەلگر ژ جورێ شۆفرلێت دا گرتیە کو دخواستن هندەک ولاتیان ب ئاوایەکێ قاچاغ ب رێیا دەریێ سینۆری یێ سەیرانبەن بگەهینن ئیرانێ، لێ ژ بەر پێنەدانا باجێ ب چەکدارێن پەکەکی، چەکداران گەلەک سڤکاتی ب وان کرینە و شەرەنیخ د ناڤبەرا چەکدارێن پەکەکێ و خەلکی دا دەرکەتیە، پشتی ڤێ یەکێ چەکدارێن پەکەکێ ب زمانەکێ گەلەک توند و گەف کرن ل گەل وان دا دپەیڤن و گەلەک سڤکاتیێن مەزن ل وان دکەن.
ئەڤە نە جارا یەکەمینە کو چەکدارێن پەکەکێ کارێن ب ڤی ئاوا ئەنجام ددەن، ل هەر هەرێما کو چەکدارێن پەکەکێ ل وێ دەرێ هەبن ئەڤ کارە دوبارە دبن، ل هەر جهەکێ کو چەکدارێن پەکەکێ تێدا بن خالێن بشکنینێ و وەرگرتنا باجا ب زۆرێ ژی هەنە، ب ئاوایەکێ کو ل ناڤچەیێن سینۆری گەل نکاریت ب کێفا دلێ خوە کار بکەت، ژبەرکو چەکدارێن پەکەکێ وان نەچار دکەن باجێ ب وان بدەن، گەر گەل باجێ ب چەکدارێن پەکەکێ نەدەت، گەفێن کوشتن و شەوتاندن و ژناڤبرنا کاری ل وان دهێتە کرن.
