ھەڤسەرۆکێ ھەدەپێ میتھات سانجار، جڤینەک ل گەل پارتیێن تفاقا کوردستانی ل ئامەدێ ئەنجامدا. سانجار پشتی جڤینێ داخویانیەک دا چاپەمەنیێ.
ھەڤسەرۆکێ ھەدەپێ متھات سانجار دوهی ل ئامەدێ لگەل حیزبێن تفاقا کوردستانی دا جڤیا و پاشێ داخویانیەک دا چاپەمەنیێ.
سەرۆکێ گشتی یێ پەدەکە ترکیا مەھمەت ئەمین کارداش، سەرۆکێ گشتی یێ پەدەکە باکور سەرتاچ بوجاک، ھەڤسەرۆکێن دەبەپێ سالیحا ئایدەنیز و کەسکین بایندر، پارلامەنتەرێن ھەدەپێ یێن ئامەدێ ئیمام تاشچیەر، سەمرا گوزەل، نوسرەتتین ماچین، سەرۆکێ شاخا ئامەدێ یا ھەدەپێ زیاد جەیلان، سەرۆکێ گشتی یێ پارتیا کۆمونیستا کوردستانێ (کەکەپە) سینان چیفتیورەک، ئەندامێن مەجلسا پارتیا سۆسیالیستا کوردستانێ (پەسەکە) عەلی حەیدەر فورات و وەدات دەدە، سەرۆکێ پارتیا مرۆڤ و ئازادیێ (پا) مەھمەت کاماچ و ھەژمارەک کەسێن دن بەشداری جڤینێ بوون.
سانجار دا خویاکرن کو ئارمانجێن تفاقێ د چارچۆڤەیا پارتیێن کوردستانی دا د قۆناغەک نوو دا نە و گۆت: “ئەم دخوازین تفاقەکا بەرفرەھ پێک بینین. ئارمانجا مەیا ئاڤاکرنا تفاقا ھەری مەزن یا نھا د قۆناغەک نوو دایە. بەری ھەر تشتی ئەم دخوازین بنگەھێن پارتیان چارەسەر بکەین. لگەل پارتیێن سیاسی دا ژی ھەڤدیتنێن مە ھەنە. مە شاندەک شاندە جەم 4 پارتیێن ئۆپۆزسیۆنێ.”
ھەڤسەرۆکێ گشتی یێ ھەدەپێ دەستنیشان کر، کو ل ترکیێ دەستھلات مانا خوە د شەری دا دبینیت و تەکەز کر، ئەو دخوازین ل ھەمبەر وێ یەکێ ئەنیەکا ئاشتیێ ئاڤا بکەین.
سانجار ھەروەھا دا خویاکرن، ھەدەپێ پرۆژەیەک ھەیە ژ بۆ ئاڤاکرنا ھەڤپەیمانیا ئاشتی و دەمۆکراسییێ.
ب ناڤ تفاقا کوردستانی یە لێ چ داخوازیێن کوردستانی نادەن پێش. ھەروەھا پرانیا ڤان پارتیێن کو ناڤێن وان دەرباس دبن د چارچۆڤەیا سیاسەتا پەکەکێ دا تەڤدگەرن.
