حكوومه‌تا باشوورێ كوردستانێ، ئیرۆ ب دژواری به‌رسڤا حه‌یده‌ر عه‌بادی سه‌رۆكوه‌زیرێ به‌رێ یێ ئیراقێ و سه‌رۆكێ هه‌ڤپه‌یمانییا نه‌سر، ل ده‌ربارێ بوویه‌رێن 16 ئۆكتۆبه‌رێ دایه‌.

هه‌ڤپه‌یمانییا نه‌سر یا حه‌یده‌ر عه‌بادی ئیرۆ رۆژا شه‌مبی 16/10/2021ێ داخویانی ل ده‌ربارێ بوویه‌رێن 16 ئۆكتۆبه‌را 2017ێ دایه‌ و تێدا‌ ب شانازی ڤه‌ باس ل وان جه‌زایان دكه‌ت‌ كو ل سه‌ر هه‌رێما باشوورێ كوردستانێ هاتنه‌ سه‌پاندن و ئه‌ڤ یێك ب ده‌ستكه‌فتی ژ بۆی عه‌بادی حه‌ساب كرییه‌.

د ڤێ ده‌ربارێ دا‌، د. جۆتیار عادل، به‌رده‌ڤكێ حكوومه‌تا باشوورێ كوردستانێ، ب دژواری به‌رسڤا عه‌بادی و هه‌ڤپه‌یمانییا وی یا ب ناڤێ نه‌سر دا و گۆت: راستی ژ بۆی ته‌ڤاهییا گه‌لێ ئیراقێ روهن بوویه‌، هه‌لبژارتنێ جه‌زایێ وان كه‌سان دایه‌ كو ب تاكره‌وی د خواستن ده‌ستهه‌لاتێ برێڤه‌ببن.

به‌رده‌ڤكێ حكوومه‌تا باشوورێ كوردستانێ، هه‌روه‌ها ده‌ست نیشان كر كو هه‌ڤپه‌یمانییا نه‌سر، ژ بۆ كو شكه‌ستنێن یێك ل دووڤ یێك یێن عه‌بادی یێن د هلبژارتنێن پارلمه‌نا ئیراقێ دا‌ ب په‌چنیت‌، هاتییه‌ و وان فه‌رمانێن تاكره‌و‌ ل بیر تینیت كو ب ئیمزایا عه‌بادی ل ئۆكتۆبه‌را 2017ێ هاتنه‌ ده‌ركرن.

به‌رده‌ڤكێ حكوومه‌تا باشوور دبێژیت‌: راستی ژ بۆ گه‌لێ ئیراقێ ئیفشا بوویه‌ و هه‌لبژارتنا ڤێ جارێ ژی سه‌لماند كو سیاسه‌تا ته‌كئالی دۆمدار نابیت و هه‌روه‌ها هه‌ولێن سه‌ركوتكار ژی تم راستی شكه‌ستنێ تێن.