مەزلووم عەبدی: ھەرێما مە ل پێشبەر قۆناغەکا نوویە

مەزلووم عەبدی: ھەرێما مە ل پێشبەر قۆناغەکا نوویە

 فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی گۆتیە، ھەرێما وان باکور و رۆژھلاتێ سووریێ ل پێشبەر قۆناغا نوویە، ئەو دێ ژ بۆ ھەموو ئاستەنگیێن کو بەرێ تێ را دەرباس بوونە، چارەسەریێن نوو ببینن.

مەدیایا نێزیکی پەیەدێ راگھاندیە کۆنگرەیا دامەزرینەرا ھەڤبەندیا رێخستنێن جڤاکا سڤیل ل باکور و رۆژھلاتێ سووریێ 2 رۆژان ل باژارێ قامشلۆیێ دەوام کریە و فەرماندارێ گشتی یێ ھەسەدێ مەزلووم عەبدی ب رێیا دیمەن بەشداری کۆنگرەیێ بوویە.

ھەروھا مەزلووم عەبدی گۆتیە: “ئەم ھەسەدێ ب ئالیکاریا سازیێن رێڤەبەریا خوەسەر دێ پشتەڤانیا رێخستنێن جڤاکا سڤیل د ھەر گاڤەکێ دا کەین و ب یەک دەستی کار کەین کو تەڤاھی ئالیان ل ھەرێمێ ب پێش بخن.”

ھەروەھا عەبدی ئانی زمان کو رێخستنێن جڤاکا سڤیل ئالیەکی بنگەھینە کو دکارن رۆلەک مەزن د خەباتا گوھارتنا بەر ب دەمۆکراسی ڤە، پشتەڤانی و پێخستنا جڤاکێ دا بگێرن.

عەبدی بەحسا پشتەڤانیا ژ ھەڤبەندیا رێخستنێن جڤاک سڤیل کر و ھێڤی کر کو رێخستن گاڤێن نوو بەر ب پێشخستن و دەمۆکراسیێ ڤە باڤێژن.

ھەر وھا عەبدی گرینگیا پاراستنێ ل ھەمبەری گەفێن بێناڤبەرێن ل دژی ھەرێمێ دەستنیشان کر.

جھێ بەحسێیە دەمەکە دیسان بەرپرسێن ترکیێ گەفا ئێریشێ ل ھێزێن ھەسەدێ دکەن و لەشکەرێن خوە ل سەر ھەرێما تل رفعەتێ ب جی دکەن و فەرمانا ئامادەبوونا شەری ژ کۆمێن چەکدارێن ئۆپۆزیسیۆنا سووریێ ژی کریە.