سێكس و په‌ره بازارا گه‌رم و گور ئا هلبژارتنێن ئیراقێ بوو
ته‌ڤی كو هلبژارتنێن پارلمه‌نا ئیراقێ ب داوی بوون و ئێنجام ژی خوه‌یا بوون، لێ به‌لێ ئه‌ڤ نایێ واته‌یا كو ئه‌ڤ پێڤاژۆ سه‌ركه‌تی بوو، ئه‌ڤ هلبژارتن ل ئاستا هه‌ری ژۆر ئا شه‌رمه‌زاری و بێئه‌خلاقیێ بوو، رایه‌دارێن كو د بانگه‌شه‌یێ دا سۆزا ده‌رخستنا هێزێن داگیركه‌ر ب گه‌ل ددان، وان ژ بۆی ب جی كرنا ڤێ سۆزا خوه پێسیر و پاشیێن ژنێن كاندید كرن هه‌ده‌فا خوه.
پێگه‌ها «داركا مازی» دوكیۆمه‌نت و ریكۆردێن ده‌نگ ئێن هنه‌ك ژ نیقاشێن پشتگریێ و كۆم كرنا ده‌نگان ژ بۆ كاندیدێن ژن یێن پارلمه‌نا ئیراقێ ب ده‌ست خستنه و كانێ ب تو ئاوایی رایه‌دارێن له‌شكری و سیاسی بازار ب كارتێن ده‌نگدێران، ل همبه‌ری په‌ره و سێكسی دكر.
سه‌رایا خوراسانی ل مووسلێ چ دكر؟
ئوسامه نوجێفی كارتێن ده‌نگدێران ب 25.000 دیناران دكڕین
سه‌رایا خوراسانی هێزه‌كه چه‌كداری یا حه‌شدا شه‌عبی یه، فه‌یسه‌ل سه‌عید زیاب فه‌رماندارێ ڤێ هێزێ یه ل مووسلێ، چاڤكانیێن مه یێن، تایبه‌ت ئه‌شكه‌ره كرن، ل رۆژا 21/9/2021ان، كو ل وێ ده‌مێ بانگه‌شیا هلبژارتنێ دهات مه‌شاندن، فه‌یسه‌ل زیاب پێوه‌ندی ب كاندیده‌كه ژن كر كو ناڤێ وێ زوحا عه‌بدولجه‌بار فه‌تحی سه‌لیم ئه‌ل تائی یه، زوحا ل بازنه‌یا 7 ئا مووسلێ كاندید بوو، لێ به‌لێ ئه‌و ل تاخا فه‌رمانبه‌ران یا ل هه‌ولێرێ ئاكنجی یه.
فه‌رماندار فه‌یسه‌ل زیاب، د وێ پێوه‌ندیێ ده بازارا فرۆتنا ده‌نگێن هێزا خوه یا چه‌كدار كو ب قاسی 1200 ده‌نگان ب زوحایێ ره دكر و ژێره گۆ: هێزه‌كه مه ب قاسی 1200 چه‌كداران هه‌یه، ئه‌مێ پشتگرییا وه بكن، لێ به‌لێ ژ بۆی ڤێ پێویسته په‌ره ژ من ره وه‌رن دابین كرن، ل گۆری تۆمارا وێ پێوه‌ندییا تێله‌فوونی كو ب ده‌ست پێگه‌ها مه كه‌تییه، فه‌یسل ڤێ ژ زوحایێ ره دبێژه:
«هوون دزانن كارتێن ده‌نگدێران ب قاسی 75.000 دیناران دهاتن فرۆتن، لێ به‌لێ نها ئوسامه كلدانی كارتێ ب 150.000 دیناران ژ بۆی برایێ خوه یێ كاندید ئه‌سوان كلدانی تینه، هه‌ر وها ئوسامه نوجێفی بۆ هه‌ر كارته‌كی 250.000 دیناران دده».
ل گۆری تۆمارا ده‌نگی، فه‌یسه‌ل ئاخافتنا خوه ل گه‌ل زوحا د دۆمینه و ژێره دبێژه كو ئه‌سوان كلدان نوونه‌رێ خوه شاندییه جه‌م مه و ژ مه‌ره گۆ، ئه‌م دخوازن ده‌نگێن چه‌كدارێن وه یێن یه‌كینه‌یێن سه‌رایا خوراسانی بكڕن.
ل خوله‌كا 2:49، 5:20ێ هه‌تا 5:40ێ، فه‌یسه‌ل بهایێ كارتێن ده‌نگدێران دبێژه.
سێكس ل همبه‌ری پشتگریێ!
ژ هێلا خوه ڤه زوحایێ ژ فه‌رماندارێ یه‌كینه‌یێن سه‌رایا خوراسانی رە گۆت كو په‌ره‌یێن وێ تونه‌نه، هه‌روه‌ها ژێره گۆت كو ئه‌و چوویه جه‌م نووری مالكی و داخوازا پشتگریێ ژێ كرییه، لێ به‌لێ یێك ژ هه‌ڤڕێیێن نێزی مالكی ب ناڤێ محه‌مه‌د یه‌عروبی ژ زوحایێ ره گۆ هه‌گه‌ر هوون رازی بن سێكسی ل گه‌ل مالكی ئه‌نجام بدن، ل وێ چاخێ مالكی وێ پشتگریێ بده وه.
زوحایێ گۆت كو یه‌عروبی ژ وێ خوه‌ست كو ئه‌و ب ته‌نا سه‌رێ خوه ژ مووسلێ وه‌ره به‌غدایێ، لێ به‌لێ ئه‌وێ ئه‌ڤ داخوازی ره‌د كر.
ل خوله‌كا 24:20 ێ زوحا به‌حسا نووری مالكی دكه و كانێ هه‌ڤڕێێ مالكی ب تو ئاوایی سێكسی ژێ دخوازه.
هه‌ر ل گۆری تۆمارا ده‌نگی فه‌رماندارێ سه‌رایا خوراسانی به‌رسڤا زوحایێ دده و ژێره دبێژه، ئه‌م دكارن پشتگریێ بدن ته، لێ به‌لێ ل وێ چاخێ هوون ب سه‌ركه‌تن، پێویسته تو به‌شه‌كا مووچه‌یا خوه ژ بۆی مه ته‌رخان بكی و ژ بۆی ڤێ ژی پێویسته ل سه‌ر دۆكیۆمه‌نتان ئیمزه و په‌نجه‌مورا وه هه‌به.
ل گۆری ئاخافتنا فه‌یسه‌ل زیاب ئۆفیسا سه‌رایا خوراسانی یا مووسلێ 1200 چه‌كدارێن وان هه‌نه و ئه‌ڤ ده‌نگ ل سه‌ر 4 كاندیدان هاتنه دابه‌ش كرن و ب ڤی ئاوایی:
زوحا عه‌بدولجه‌بار فه‌تحی سه‌لیم ئه‌ل تائی ژماره 40 ل سه‌ر بازنه‌یا 7 یا مووسلێ ل سه‌ر پارتییا التصحیح الوطنی.
خالد قاسم یه‌حیا عه‌لی ئه‌ل بجاری ژماره 102 ل بازنه‌یا 6 یا مووسلێ كاندیدێ سه‌رایا خوراسانی یه.
جاسم ئه‌حمه‌د ئه‌نهیر مه‌حه‌ل ئه‌ل جبووری ژماره 45 ل بازنه‌یا 6 و كاندیدێ هه‌ڤپه‌یمانییا عه‌قد ئه‌ل وه‌ته‌نی یه.
شاهید لوقمان سه‌عید سالح ژمار 63 ل بازنه‌یا 8 و كاندیدێ هه‌ڤپه‌یمانییا عه‌قد ئه‌ل وه‌ته‌نی یه.
هلبژارتنێن پارلمه‌نا ئیراقێ ل ڤێ ئاستا بێئه‌خلاقیێ هاتن مه‌شاندن، گه‌فخوارن، په‌ره و نامووسا كاندیدان ئاموورێ بازارێ بوو، كاندیدێن ژن یێن مینا زوحایێ ژی تایبه‌ت یێن كو په‌ره‌یێن وان تونه بوون و نه‌هشتی تو رایه‌دارێن بێئه‌خلاق ته‌جاوزی وان بكن سه‌رنه‌كه‌تن، زوحایێ ته‌نێ 97 ده‌نگ د هلبژارتنێ ده ب ده‌ست خستن.
موقته‌دا سه‌در ژ هه‌ر پارلمنته‌ره‌كی 1 ملیۆن دیناری دستینه
فه‌رماندار فه‌یسه‌ل زیاب باس ل رێبه‌رێن ئۆلی یێن ئیراقێ دكه كا ئه‌و ب تو ئاوایی پارلمنته‌ران ژ بۆی خوه ب كار تینن و پێش وه‌خا وان ب په‌ره‌یان دكڕن، واته هه‌ر پارلمنته‌ره‌كێ رازی نه‌به وه‌ختا كو ب سه‌ركه‌ت به‌شه‌كێ مووچه‌یا خوه ب وان بده، پشتگریێ پێ نادن، بۆ میناك: موقته‌دا سه‌در ژ هه‌ر پارلمنته‌ره‌كێ خوه 1 ملیۆن دیناری دستینه، كوالیسیۆنا سائیروون پێتری 70 كورسییان برنه و ب ڤێ ده‌ستكه‌تیێن شه‌خسی یێن سه‌دری پێتری 70 ملیۆن دینارانه د یێك مه‌هێ ده.
ل خۆله‌كا 23:20 هه‌یا 24:00 فه‌یسه‌ل به‌حسا موقته‌دا سه‌در دكه كانێ چه‌ند په‌ره‌یان ژ هه‌ر پارلمنته‌ره‌كێ خوه یێ كوالیسیۆنا سائیروون دستینه.
پارتیێن شیعه و رایه‌دارێن وان پارتییان یێن كو ژ پاش نه‌مانا رەژێما سه‌دام یا دیكتاتوور ده‌ستهلاتا ئیراقێ گرتنه، ژ وێ ده‌مێ ڤه د هه‌موو هلبژارتنان ده ب سه‌دان سۆز و په‌یمانێن ده‌ره‌و ب گه‌لێن ئیراقێ دده‌ن و ژێره دبێژن هوون ڤێ جارێ ژی ده‌نگێ خوه بدن مه، ئه‌مێ ڤی وه‌لاتی خوه‌ش ئاڤا كن، ئه‌مێ ژ بن باندۆرا ده‌وله‌تێن هه‌رێمی ده‌رخن، ئه‌مێ هێزێن داگیركه‌ر یێن ئامه‌ریكایێ ده‌رخن و ب ده‌هان سۆزێن دن، لێ به‌لێ ژێر ب ژێر ئه‌ڤ رایه‌دار پێسیر و پاشییا ژنان ب ته‌كانه رێیا ب جی كرنا ڤان سۆز و په‌یمانان دبینن، ئه‌و دخوازن ب ته‌جاوزا ل سه‌ر ژنان چاندا رەژێما سه‌دام ده‌مۆكراتیك بكن، وان ته‌نێ ئه‌ڤ رێ ژ بۆ ژنان هشتییه.
ل خوله‌كا 2:49 ، 5:20ێ هه‌تا 5:40ێ فه‌یسه‌ل بهایێ كارتێن ده‌نگدێران دبێژه.
ل خوله‌كا 23:20 هه‌یا 24:00 فه‌یسه‌ل به‌حسا موقته‌دا سه‌در دكه كانێ چه‌ند په‌ره‌یان ژ هه‌ر پارلمنته‌ره‌كێ خوه یێ كوالیسیۆنا سائیروون دستینه.
ل خوله‌كا 24:20 ێ زوحا به‌حسا نووری مالكی دكه و كانێ هه‌ڤڕێێ مالكی ب تو ئاوایی سێكسی ژێ دخوازه.
