بەرپرسێن پەدەکێ ب توندی بەرسڤا قەرەییلان دا

بەرپرسێن پەدەکێ ب توندی بەرسڤا قەرەییلان دا

بەرپرسێن پەدەکێ ب توندی بەرسڤا سەرکردەیێ پەکەکێ موراد قەرەیلان دا کو ئێرشی پەدەکێ کربوو.

ئەندامێ رێڤەبەریا پەکەکێ موراد قەرەیلان د داخویانیا خوەیا ھەری داوی دا ئێرشی پەدەکێ کریە و بوختانا وێ یەکێ ئاڤێتیە سەر وێ پارتیێ کو پەدەکە ل همبەر یەکرێزیا نەتەوی ئاستەنگە!

ئەندامێ سەرکردەتیا پەدەکێ و بەرپرسێ لقا 16 یا پەدەکێ، بلند ئیسمایل ل سەر ڤێ مژارێ ژ بۆی باس نیوسێ گۆت، ھەر کەس دزانیت کو پەکەکە ژ رۆژا کو ھاتیە ئاڤاکرن ڤە ھەتا نھا ئەجیندایا وەلاتێن ھەرێمی بجیھ تینیت، بەھانەیان ددەتە دەستێ ترکیێ دا کو ئێرشی کوردستانێ بکەت. پەکەکە بوویە سەبەب دا کو زێدەتری 500 گوندێن کوردستانێ وێران ببن و نەیێن ئاڤەدانکرن.

بلند ئیسمایل ھەر وەھا گۆت، پەکەکە بازرگانیا مادەیێن ھشبەر دکەت، زارۆکان درەڤینیت. ژ باکورێ کوردستانێ و ترکیێ رەڤیانە و ھاتنە ڤێرە بوونە بەلا ل سەر سەرێ خەلکێ کوردستانێ. ئەگەر ب راستی ئەو د خەما کوردستانێ دا بن دێ تەنێ سالەکی چەکدارێن خوە بەنە مەیدانا شەری لێ ئەو تەنێ بۆ بەرژەوەندیێن داگیرکەران کار دکەن.

وی سەرکردەیێ پەدەکێ ئانی زمان ژی، سیاسەت و رەفتارێن پەکەکێ نیشان ددەن کو پەکەکە د بن دا لگەل دەولەتێن داگیرکەرێن کوردستانێ دا رێکەفتن کریە بۆ کشاندنا وان بۆ ناڤ خاکا ھەرێما کوردستانێ. چ رێژیمەکا دەردۆر ب قاسی پەکەکێ دژبەریا ھەرێما کوردستانێ و دۆزا کوردستانێ نەکریە. ئەو بۆ دژبەراتیێ و نەیارتیا ھەرێما کوردستانێ ھاتنە ئەرکدارکرن. ئەو تەنێ ل ھەرێما کوردستانێ ڤێ یەکێ ناکەن، ل رۆژئاڤا و رۆژھلات ژی ھەمان کاری دکەن.

بلند ئیسمایل خویا ژی کر، پەدەکە ل سەر خاک و مەیدانا راستیا خەباتا خوەیە کو ھەرێما کوردستانێ یە، لێ پەکەکێ ھەموو عورف و قانوونێن ناڤدەولەتی بنپێ کریە و دخوازیت کوردستانێ تەسلیمی وێ بکەن.

شیرەتکارێ پۆلیتبورۆیا پەدەکێ، عارف روشدی ژی ژ بۆی باس نیوسێ گۆت، دڤێت پەکەکە دەرسێ ژ ھلبژارتنێن گشتی یێن ئیراقێ بگریت کو چاوا دیتن زێدەباری چاڤترساندنا خەلکێ شنگالێ، خەلکێ دەنگ دا پەدەکێ. ئەڤە باشترین بەرسڤە بۆ قەرەییلان. خەلکێ کوردستانێ دزانن پەدەکە پارتیەکا چاوایە و ئەو ژی کرێگرتی نە.

عارف روشدی ھەر وەھا گۆت، تەڤاھیا خەلکێ ژ سیاسەتا پەکەکێ بێزارن و دزانن سەرکردەیێن پەکەکێ ھەر تشت خستنە خزمەتا ئاژاندەیا ئیستخباراتا دەولەتێن ھەرێمی و وەلاتێن داگیرکەرێن کوردستانێ.

ب گۆتنا روشدی، ژ بەر کو پەدەکە ستاتوو و ھەبوونا ھەرێما کوردستانێ دپارێزیت، راستی غەزەبا پەکەکێ دهێت و دژبەریا وێ دکەت لێ دڤێت پەکەکە بزانیت دێ د ڤی کاری دا زەرەرمەند ببیت.

شیرەتکارێ پۆلیتبورۆیا پەدەکێ بانگ ل موراد قەرەیلان و سەرکردەیێن دی یێن پەکەکێ کر دەست ژ فتنەیێ و ھەولا دەرخستنا ناکۆکیێ د ناڤبەرا ئالیێن کوردستانی دا بەردەن، ژ بەر کو هیچ کەسەک باوەریێ ب ساختەکاریێن وان ناکەت. بەلگەیا وێ ژی ھەژمارا کورسیێن پەدەکێ د ھلبژارتنان دایە کو ل سەر ئاستا ئیراق و کوردستانێ یەکەمە.

عارف روشدی ئەڤ ژی گۆت، سەرکردەیێن پەکەکێ پەیایێن دژمن و نەیارێن کوردستانێ نە و رۆژێ دەڤەرەک و ناڤچەیەکا ھەرێما کوردستانێ تەسلیمی ترکیا و یێن دی دکەن.

پوستێن ھەمان بەش