پەکەکە دخوازیت د شکەستنا خوە یا د هلبژارتنا پارلەمانێ ئیراقێ دا خەلکی تاوانبار نیشان بدەت و گەفا ل خەلکێ شنگالێ دکەت. پەکەکە تەهدیدان ل خەلکی دکەت کو ئەو ئێدی هاریکاریان ل سەر وان بەلاڤ ناکەت، وان ناپارازیت و دبێژیتە خەلکێ شنگالێ هەوە خیانەت ل شەھیدان کر.
پەکەکێ د ھلبژارتنا پارلەمانێ ئیراقێ دا شکەستنەک مەزن خوار و دەنگێن ھەردو کاندیدێن وێ ب گشتی نەبوونە 3 ھەزار دەنگ. یەک ژ وان کاندیدێن پەکەکێ راکان رەشید ئەل تاھان یێ ب رەگەز عەرەب بوو و د عەشیرەتا وی دا نێزیکی 2 ھەزار دەنگدەران ھەبوون و میلیشیایێن حەشدا شەعبی ژی دەنگ دابوونە ڤی کاندیدێ پەکەکێ یێ عەرەب. پەکەکێ ژی نێزیکی 300 کارتێن ساختە چێکربوون و ب وان کارتان دەنگ دانێ. ووسا دییارە کو کاندیدێ پەکەکێ شێخ سەمیر ژی نێزیکی 600 دەنگان ب دەست خستنە. هەلبەت پەکەکێ نیزیکی 600 گەنج د ناڤا رێزێن حەشدا شەعبی دا ناڤ نڤیس کرینە و ئەو ب مووچە خستینە. واتە مالباتێن وان کەسێن کو د ناڤا هێزێن عەسکەری یێن پەکەکێ دا جیھ دگرن ژی دەنگ نە دانە پەکەکێ. ڤێ یەکێ پەکەکە تووشی شکەستنەکا مەزن کر.
پەکەکە د راگەھاندنا خوە دا ب چ رەنگا باسی ڤێ یەکێ ناکەت کو شکەستنەکا ووسا مەزن ھاتییە ژییانکرن. وەکە کو ھلبژارتن نەهاتبنە ئەنجام دایین تەڤ دگەریت. ژبەرکو پەکەکێ د ناڤا شەنگالێ دا کو 34 ھەزار دەنگدەر هەنە ب تەنێ 600 دەنگ ئانینە، نها دەست ب گەف کرنێ ل گەلێ شەنگالێ کریە. پەکەکێ هندەک کادرێن خوە یێن رۆژئاڤا و باکور دشینیت ناڤ گوند و کامپێن ل چیایێ شەنگالێ و جڤینان ددەنە چێکرن. کادرۆیێن پەکەکێ د جڤین و سەرەدانا کامپا دا گەفان ل خەلکی دکەن و دبێژن “هەڤالێن مە ژ بەر هەوە شەھید بوونە، ھەگەر ئەم نەبوونا ھوون ھەموو نها دا د دەستێ داعشێ دا بن. مە هوون رزگار کرن، هەوە خیانەت ل مە و شەھیدان کر”. ھەمان دەمێ پەکەکە دبێژیت، “ئێدی ئەم چ هاریکاریان نادەین هەوە. پەکەکە دەست دانیتە سەر وان هاریکاریێن ب رێیا یەکیتییا ئەورۆپا و یۆئێنێ ژ بۆ خەلکێ شەنگالێ تێنە شاندن و بەلاڤ دکەت. ب ئاوایەکێ گشتی ئەڤ هاریکاریە ژ هندەک مادەیێن خۆراکی و پێدڤیێن دی یێن ژیانێ وەکە بەتانی و تشتێن دی یێن ب ڤی ئاوایی پێک دهێن. لێ پەکەکە نها دبێژیتە گەلێ شەنگالێ مە ئەڤ هاریکاریە دخواستن، ئێدی ئەم ڤان هاریکارییان ژ کەسێ ناخوازین و ئەم نادەنە هەوە. هەرن بلا پارتی ئەرزاقی بدەتە هەوە”.
ھەمان دەم پەکەکە ناڤ شەرڤانێن یەبەشێ دا ژی دبێژیت، بۆچی عەشیرەتێن هەوە دەنگ نە دانە مە و وان تاوانبار دکەن.
پەکەکێ نە تەنێ ل شەنگالێ بەلکو ل سلێمانیێ ژی د چەند بازنەیان دا 4 کاندید ھەبوون، لێ بەلێ هەژمارا دەنگێن ڤان کاندیدێن پەکەکێ ژی نەبوونە 1000 دەنگ.
ژ بەر ڤێ یەکێ پەکەکە وان ئەنجامێن د هلبژارتنێن پارلامانتۆیا ئیراقێ دا بدەست خستی باس ناکەت.
