ل باژارێ دێرسمێ یێ باکورێ کوردستانێ پۆلیسان رێگری ل کۆنسەرتەکا ب زمانێ کوردی کر کو د چارچۆڤەیا چالاکیێن ھونەری یێن شارەداریا دێرسمێ دا ھاتبوو رێکخستن.
رۆژا ئینێ 22یێ جۆتمەھا 2021ێ د چارچۆڤەیا چالاکیێن “ئاتۆلیەیا-خەباتگەھا تەمبوورێ” دا کو سێ رۆژە بەردەوام بوون، رێکخەرێن خەباتگەھێ ھونەرمەند میکایل ئاسلان و جەمیل کۆچگیری خواستن ل مەیدانا سەیید رزا ل ناڤەراستا باژارێ دێرسمێ کۆنسێرتەکێ ب زمانێ کوردی بگێرن.
لێ پۆلیسان ب بەهانەیا ڤایرووسا کۆڤد-19ێ نەھشێلا کۆنسێرت بهێتە سازکرن و ب رێیا ھۆپارلۆرێ بانگ ل ئامادەڤانان کر کو مەیدانێ بجیھ بھێلن. میکایل ئاسلان و جەمل کۆچگیری ل سازێ دان و ب زاراڤایێن کورمانجی و زازاکی ستران گۆتن و خوەندەکارێن بەشدارێ خەباتگەھێ و وەلاتیێن ل وێ دەرێ لگەل بانگا پۆلیسان ژی مەیدان ڤالا نەکرن.
شارەداریا دێرسمێ ل سەر حەسابا خوە یا تویتەرێ دەربارێ بوویەرێ دا ڤیدەۆیەک بەلاڤ کر و راگھاند کو ب وێ کۆنسێرتا هاتیە ساز کرن چالاکیێن “ئاتۆلیەیا تەمبوورێ” ب داوی تینن. سەرۆکێ شارەداریا دێرسمێ رۆژا ئەینی دا زانین کو ب رێیا ڤێ چالاکیێ خواستنە ئاماژە ب سروشت، دیرۆک، زمان، ھونەر و کولتورا خوە بدەن، لێ لگەل کو 4-5 رۆژە چالاکیێن وان بەردەوامن، ئیرۆ پۆلیسا ب بەهانەیا کۆرۆنایێ رێگریێ ل وان کر.
