په‌كه‌كێ تركیه‌ ژ ناتۆیێ ده‌رخست!!

nato-pkk-turkey-kurdistan

هه‌په‌گێ ئیرۆ داخویانی دا و ئامارا 6 مه‌هێن رابووری ئێن شه‌ر ئه‌شكه‌ره‌ كرن، ل گۆری هه‌په‌گێ د ڤێ ده‌مێ ده‌، گه‌ریلایان 670 عه‌سكه‌ر ل باشوورێ كوردستانێ كوشتنه‌.

هه‌په‌گێ باسكێ له‌شكری یێ په‌كه‌كێ ئیرۆ رۆژا یه‌كشه‌می 24/10/2021ێ، داخویانی به‌لاڤ كر و گۆت كو د د 6 مه‌هێن رابووری ده‌‌، گه‌ریلایان، 670 عه‌سكه‌ر ته‌نێ ل ناڤچه‌یێن ئاڤاشین، مه‌تینا و زاپێ یێن ل باشوورێ كوردستانێ كوشتنه‌.

ل گۆری هه‌په‌گێ د 6  مه‌هێن رابووری ده‌ 599 چالاكی ل ڤان ناڤچه‌یان هاتنه‌ ئه‌نجام دایین و كوشتنا 670 عه‌سكه‌ران ل په‌ی ڤان چالاكییان هاتییه‌.

ده‌ره‌و ووسا یان نه‌لازم

كوشتنا عه‌سكه‌رێ داگیركه‌ر نووچه‌یه‌كه‌ خوه‌شه‌، هه‌ر كورده‌كێ كێفا وی ژێره‌ نه‌یێ، پێویسته‌ ئه‌و گومانێ ژ كوردبوونا خوه‌ ببه‌، لێ به‌لێ هه‌ر كه‌س دزانه‌ رێخستنا په‌كه‌كێ د هه‌موو دیرۆكا خوه‌ ده‌ ئه‌و قاس عه‌سكه‌ر د ده‌ما 6 مه‌هان ده‌ نه‌كوشتنه‌.

په‌كه‌كه رێخستنه‌كه‌ ل سه‌ر ده‌ره‌وان ئاڤابوویه‌، ئه‌و هه‌ر گاڤ و رۆژ ده‌ره‌وكێ د ئافرینه‌، دكه‌ رۆژه‌ڤ و گه‌ل پێ د خاپینه‌، پارڤه‌كرنا‌ ڤان ئامارێن ده‌ره‌و ژی ته‌نێ یێك مه‌به‌ست ل پشته‌، ئه‌و ژی په‌كه‌كه‌ دخوازه‌ ژ گه‌ل ره‌ ببێژه‌ ڤا ئه‌زم باشوور د پارێزم و هه‌گه‌ر نه‌ ژ من به‌، ترك وێ ڤێ په‌رچه‌یا وه‌لات داگیر بكه‌، لێ به‌لێ یا راست په‌كه‌كه‌ ئه‌گه‌را سه‌ره‌كه‌‌ ئا ئێریشێن ده‌وله‌تا تركیێ یه‌‌ ل سه‌ر باشوورێ كوردستانێ.

هێژای گۆتنێ یه‌، په‌كه‌كێ ل رۆژا 24/7/2021ێ ژی داخویانی دابوو و گۆتبوو كو د 3 مه‌هێن رابووری ده‌، گه‌ریلایان 494 عه‌سكه‌ر ل باشوورێ كوردستانێ كوشتنه‌.

ئه‌ڤ یێك ب وێ واته‌یێ تێ كو په‌كه‌كێ ژ ئادارا سالا 2021ێ و هه‌یا رۆژا مه‌ یا ئیرۆ‌، 1.164 عه‌سكه‌ر ل باشوورێ كوردستانێ كوشتنه‌، هه‌گه‌ر ووسا به‌، پێویسته‌ كێفا گه‌لێ باشوور ب ئێریشێن تركیێ وه‌ره‌، ژ به‌ر كو ده‌وله‌تا ترك ب ڤی ئاوایی عه‌سكه‌رێ خوه‌ دشینه‌ هه‌لاكه‌تێ و هه‌گه‌ر په‌كه‌كه‌ ووسا ده‌وام بكه‌، د ناڤا 3 هه‌یا 4 سالان ده‌، تركیه‌ وێ بێ عه‌سكه‌ر بمینه‌ و ناتۆ ژی وێ ئه‌ندامه‌كا خوه‌ ئا چالاك وه‌ندا بكه‌!!.

ژ ئامێدیێ ئامه‌د نایێ رزگار كرن

پرسا ل ڤر تێ كرن ئه‌ڤه‌، گه‌لۆ قه‌ی هه‌گه‌ر ئه‌ڤ هه‌ژمارا هه‌په‌گێ پارڤه‌كری ووسابه‌ و ئه‌مێ بێژن هه‌گه‌ر ده‌وله‌تا ترك ژی وه‌نداهیێن خوه‌ یێن جانی ب په‌چنه‌، قه‌ی چما مه‌ د ڤێ ده‌مێ ده‌ ل سۆسیال مه‌دیایێ تو ئاگاهی، تو وێنه‌ تو تشته‌ك ژ مالباتێن عه‌سكه‌رێن كوشتی نه‌دی؟، چما مه‌ نه‌ دیت كو‌ وان وێنه‌یا ئه‌ولادێن خوه‌ پار ڤه‌كری؟، هه‌ر كه‌س دزانه‌ په‌كه‌كه‌ نكاره‌ ب ڤان ده‌ره‌وان داگیركه‌ران ژ كوردستانێ ده‌رخه‌، هه‌ر كه‌س دزانه‌ په‌كه‌كه‌ نكاره‌ ئامه‌دێ ژ ئامێدیێ رزگار بكه.