وەزارەتا پێشمەرگە یا ھەرێما کوردستانێ راگھاند؛ سەرۆکەرکانێ وەزارەتا پێشمەرگە ب ئامادەبوونا رێڤەبەریا ھەماھەنگی و پەیوەندیێن وەزارەتێ، پێشوازی ل شێورمەندێ بلندێ ھێزێن ئامەریکایێ یێ ل ھەرێما کوردستانێ و شاندا لگەل دا کر.
وەزارەتا پێشمەرگە راگھاند؛ د جڤینێ دا پێنگاڤێن پرۆسەیا چاکسازیێ ھاتن گۆتووبێژکرن و تەکەزی ل سەر جێبەجێکرن و پێکانینا پرۆسەیێ ھات کرن، کو ب ئالیکاریا وەلاتێن ھەڤپەیمان و پشتەڤانیا حکوومەتا ھەرێمێ دهێتە ئەنجامدان.
ھەروھا ئاشکەرا کر کو بەحسا پێشڤەبرن و گرینگیدانا زێدەترا پەیوەندیێن ناڤبەرا وەزارەتا پێشمەرگە و ھەڤپەیمانان ھات کرن، ھەر دو ئالیان تەکەزی ل سەر بەردەوامکرنا شەرێ دژی تەرۆرێ کر.
وەزارەتێ دیار کر کو پەیوەندیێن ناڤبەرا ھێزێن پێشمەرگەیێ کوردستانێ و ئارتێشا ئیراقێ ھات گۆتووبێژکرن، ل سەر چاوانیا پێکانین و جێگیرکرنا وان دو لیوایێن ھەڤبەش، کو بریار ل سەر ھاتیە دایین ئەرکێ وان پاراستنا ئارامی و ئاساییشا دەڤەرێن کو دکەڤنە ناڤبەرا ھێزێن پێشمەرگە و ئارتێشا ئراقێ ل دەڤەرێن کوردستانی یێن ل دەرڤەیی ئیدارەیا ھەرێما کوردستانێ.
