ژ چەکدارێن پەکەکێ ئێریش و ژ مەدیایا وێ دەرەو

ژ چەکدارێن پەکەکێ ئێریش و ژ مەدیایا وێ دەرەو

دوهی ئێڤاری ل سینۆرێ ناڤچەیا ئامێدیێ چەکدارێن پەکەکێ تەقە ل خالەکا ھێزێن پێشمەرگە کرن، لێ بەلێ د مەدیایا خوە دا ووسا دا خوەیا کرن کو هێزێن پێشمەرگە کەمین د رێیا چەکدارێن پەکەکێ دا دانیە و ئەو گولـلەبارانکرنە.

چاڤکانیێن پێگەها دارکا مازی ل باشوورێ کوردستانێ راگهاند، دوهی ئێڤاری چەکدارێن پەکەکێ ل گوندێ سەرگەلێ کو ب تەنێ 6 کیلۆمەترۆیان ژ ناڤەندا باژارێ ئامێدیێ دوورە گولـلە بەردانە خالەکا ھێزێن پێشمەرگەیێن زێرەڤانی.

چاڤکانیێن مە هەر وەها ئاشکەرا کریە کو د ڤێ ئێریشا پەکەکێ دا چ زیانێن جانی نە گهیشتن پێشمەرگەیان، لێ بەلێ ئێریشا چەکدارێن پەکەکێ هندەک زرارێن مادی ل پەی خوە ئانین.

تەڤی کو کارێن ئیستیفزازی یێن چەکدارێن پەکەکێ ل تەڤ ناڤچەیێن هەرێما کوردستانێ بەردەوامن، لێ بەلێ، ئەڤ کارە ل سینۆرێ ئامێدیێ هەر کو دچیت پێتر دبن، د داوی ئێریشا چەکدارێن پەکەکێ ل سینۆرێ ئامێدیێ دا بۆ سەر پێشمەرگەیێن کوردستانێ پێشمەرگەیەک شەهید بووبوو.

یا بالکێش د ڤێ ئێریشا چەکدارێن پەکەکێ دا مانشێت و وێنەیێ نووچەیا رۆژ نیوسێ بوو، رۆژ نیوس وەکە یەک ژ رووپەلێن سەر ب پەکەکێ کو ل باژارێ سلێمانیێ وەشانێ دکەت، وەکە هەر جار، دەست ب دەرەوان کر و راگهاند، “چەکدارێن پەدەکێ کەمین ل بەر گەریلایان دانایە”، لێ بەلێ یا راست ئەڤەیە کو پێشمەرگەیێن کوردستانێ چ کەمینەک نەدانینە بەلکو خالەکا کۆنترۆلێ یا هێزێن پێسمەرگە ل وێ دەرێ هەیە و گەلێ ناڤچەیێ تەڤ ڤێ یەکێ دزانن، ئەڤ خالا کۆنترۆلێ ژ لایێ حکوومەتا هەرێما کوردستانێ ل وێ دەرێ هاتیە دانین و چ پەیوەندیا حیزبێن سیاسی پیرە تونەیە.

یەک ژ شێنیێن گوندێ سەرگەلێ کو شاهدێ بوویەرێ بوویە و نەخواست ناڤێ وی بهێتە ئاشکەرا کرن داکو پەکەکە ئێریشی وی نەکەت ژ دارکا مازی را راگهاند، پەکەکە ب چێکرنا نووچەیێن دەرەو دخوازیت ئێریش و کارێن خوە یێن قرێژ ل دژی پێشمەرگە و حکوومەتا هەرێما کوردستانێ د بن ناڤێ دژاتیکرنا پەدەکێ بڤەشێریت. لێ بەلێ گەلێ ناڤچەیێ پەکەکە باش ناسکریە و ب دەرەوێن وان نایێن خاپاندن.