سه‌رۆكێ هه‌رێما باشوورێ كوردستانێ دبێژه: «په‌كه‌كه ژ بۆی هه‌رێما كوردستانێ بوویه سه‌رئێشییه‌ك مه‌زن، ئه‌ڤ رێخستن سه‌ده‌ما سه‌ره‌كه ئا له‌شكه‌ركێشییا تركیێ یه».
نێچیرڤان بارزانی سه‌رۆكێ هه‌رێما كوردستانێ، ئیرۆ رۆژا سێشه‌مبی 26/10/2021ێ د پانێله‌كێ ئێنستێتیۆیا «MERI» ده نرخاندن ژ بۆی هلبژارتنێن پارلمه‌نا ئیراقێ و هه‌روه‌ها له‌شكركێشییا تركیێ كر و هنه‌ك پرسێن دن كر.
نێچیرڤان بارزانی گۆت: «پێشی كو ئه‌م ببێژن ده‌وله‌تا تركیێ ڤی كاری ئه‌نجام دده، پێویسته ئه‌م بپرسن چما تركیه ڤێ دكه؟ به‌رسڤ ووسایه، په‌كه‌كه سه‌ده‌ما سه‌ره‌كه ئا ڤێ له‌شكه‌ركێشیێ یه، ئه‌ڤ رێخستن ژ بۆی هه‌رێما باشوورێ كوردستانێ بوویه سه‌رئێشییه‌ك مه‌زن، ل ده‌مه‌كێ ئه‌و نكاره تو چالاكییان ل باكورێ كوردستانێ ئه‌نجام بده».
هه‌روها گۆت: «هه‌گه‌ر په‌كه‌كه ڤان كێشه‌یان چێنه‌كه، ل وێ چاخێ ئه‌م دێ بكارن ب زه‌لالی و ب ده‌نگه‌كێ به‌رز ژ تركیێ ره ببێژن كو مافێ وه تونه هوون ئێریشا كوردستانێ بكن، لێ به‌لێ رێزا په‌كه‌كێ ژ بۆی بریار و دامه‌زراوێن حكوومه‌تا باشوورێ كوردستانێ تونه، ژ ده‌ستپێكێ ڤه په‌كه‌كه دژاتییا حكوومه‌ت و پارلمه‌نا كوردستانێ دكه و ل سه‌ر ڤی كار دۆمداره».
سه‌رۆكێ هه‌رێما كوردستانێ، د به‌شه‌كا دن یا ئاخافتنا خوه ده گۆ كو دڤێ په‌كه‌كێ پێداچوونێ د سیاسه‌تا خوه ده بكه و نابه هه‌رێما كوردستانێ بكه چاڤكانییا ئێریشان ل سه‌ر تركیێ و ئیرانێ.
نێچیرڤان بارزانی د مژارا په‌یمانا شه‌نگالێ ژی ده گۆت: «نه ته‌نێ ل سینۆران، لێ به‌لێ ل هوندر ژی په‌كه‌كه بوویه سه‌رئێش و ئه‌و سه‌ده‌ما سه‌ره‌كه ئا جی ب جی نه‌كرنا په‌یمانا شه‌نگالێ یه».
