ترکیێ ب سەدان سەرباز ل رۆژئاڤا كوردستانێ بەلاڤ كرن

turkey-army-rojava-kurdistan (2)

ئارتێشا تركیێ ب سه‌دان سه‌ربازێن خوه‌ ل باكورێ سووریێ ل دژی هێزێن كوردی یێن ل ور ب جهـ كرن، ئه‌ڤ هه‌نگاڤ پاش گه‌فخوارنێن تاییپ ئاردۆگان هاتییه‌ ئاڤێتن.

مالپەرا بلۆئۆمبەرگێ ل سەر زارێ دو بەرپرسان کو نەخوەستنە ناڤێ وان بێ ئەشکەرەکرن بەلاڤ کرییە کو د تاریکا شەڤێ دە ترکیێ ب سەدان سەربازێن خوە ل باکورێ سووریێ ل دژی هێزێن کوردی بەلاڤ کرنە، داکو چەند ناڤچەیان ل باشوورێ کۆبانی کۆنترۆل بکە و ناڤچەیێن بن کۆنترۆلا خوە ل رۆژهلات و رۆژئاڤایێ چەمێ فراتێ ب هەڤ ڤە گرێدە.

ئەو هەردوو بەرپرس دبێژن، ب ئه‌وان ئێریشان چەند ئارمانجێن ترکیێ هەنە، دخوازە پشتگرییا ناڤخوەیی ب دەست بخە، گوشارێ ل ئامەریکا و رووسیایێ بکە داکو سینۆرەکی ژ هێزێن کوردی رە دەینن، هەڤدەم ئارمانجەکە دن گرتنا بنکەیێ ئەسمانی یێ مناخە ل نێزیکێ باژارۆکێ ئەعزازێ کو د دەستێ یه‌په‌گێ دە یە و ترکیە وەک جهێ ئێریش و خوەڤەشارتنا شەرڤانان ب ناڤ دکە.

ل دەستپێکا ڤێ مەهێ دو ئەفسەرێن پۆلیسێن ترک ل سەر سینۆرێ سووریێ د بۆمبەبارانەکێ دە هاتن کوشتن، پشتی ڤێ بوویەرێ ئەنقەرێ ئێریشێن خوە بۆ سەر پێگەهێن یه‌په‌گێ زێدە کرنە، ئامەریکایێ کوشتنا هەردو ئەفسەرێن ترکیێ شەرمەزار کر، لێ خوەست ئالی رێزێ ل ئاگربەستا شەر بگرن.

 پشتی وان ئێریشان، سەرۆککۆمارێ ترکیێ رەجەپ تاییپ ئەردۆگان ئاماژە ب پلانا ئۆپەراسیۆنەکە نوو دا، نها ژی کو هێزێ ل باکورێ سووریێ کۆم دکە، ل سەر گەفێن خوە بەردەوامە.

ئەردۆگان ڤەکری نەگۆتیە ئۆپەراسیۆئەنکە سەربازی دکە، لێ گۆتیە شەرێ ترکیێ ل سووریێ «ب ئاوایێن جودا» بەردەوام دبە. سەرۆککۆمارێ ترکیێ دەما ژ ئازەربایجانێ ڤەگەریا ژ مەدیایێ رە گۆت: «نها ترکیە ل سەر سینۆر رووبروویێ گەفا تەرۆریستان بوویە، ئەم ژی ب هەمان ئارمانجێ د شەرێ تەرۆریستان دە بەردەوام دبن.»

د سالا 2019ان دە ئەنقەرە ل گەل رووسیا و ئامەریکایێ رێکەفت کو ئێریشێن سەر هێزێن کوردی راوەستینە ب مەرجێ یه‌په‌گه‌ ژ تەڤاهییا سینۆر ب درێژییا 30 کیلۆمەترەیان ڤەکشە، لێ نها ترکیە هەردو ئالییان ب وێ یەکێ تۆهمەتبار دکە کو یه‌په‌گه‌ پابه‌ندی ب وێ سۆزێ نەکرنە.

ئاردۆگان چما وها دکە؟

بلۆئۆمبەرگ دبێژە پێگەها سەرۆککۆمارێ ترکیێ ژ بەر تێکچوونا رەوشا ئابۆری و بلندبوونا ئەنفلاسیۆنێ لاواز بوویە، ئۆپەراسیۆنەکە نوو دژی یه‌په‌گێ دبە وها بکە کو پشتگرییا ترکێن نیژادپەرەست و کۆنسەرڤاتیڤ بدەست بخە، لێ ئەگەر ژی هەیە رووبرووبوونەکە دن ل گەل ئامەریکایێ بهایێ لیرەیێ ترکی زێدەتر داخینە، کو ئیسال بهایێ لیرە گەهشت ئاستا هەری نزم.