بەشداربوونا پێشمەرگە د بەرخوەدانا کۆبانی دا ب واتەیا ژناڤبرنا زھنیەتا پەیمانا لۆزانێ دهێت

بەشداربوونا پێشمەرگە د بەرخوەدانا کۆبانی دا ب واتەیا ژناڤبرنا زھنیەتا پەیمانا لۆزانێ دهێت

ئیرۆ 28ێ جۆتمەھێ یە، 7 سال بەرێ د ررۆژەکا وەکی ئیرۆ دا ب فەرمانا سەرۆک مەسعوود بارزانی، ھێزێن پێشمەرگە ژ بۆ شەرێ ل دژی داعشێ و پشتەڤانیکرنا ھێزێن کوردستانی یێن ل رۆژئاڤا دەرباسی کۆبانێ بوون.

رۆژا 28ێ جۆتمەھا 2014ێ، ھێزێن پێشمەرگە ژ دەریێ سینۆری یێ ئیبراھیم خەلیل – خابوورێ دەرباسی باکورێ کوردستانێ بوون و پشترا د بن ئێریشا داعشێ دا دەرباسی کۆبانێ بوون.

ھەر چەند ھندەک دەردۆرا دخواستن دەرباسبوونا پێشمەرگە بۆ رۆژئاڤا بێ واتا بکەن و وەک گاڤەکا ھێسان بدەنە ناسین، لێ یا کو د راستیێ دا هاتیە ئەنجامدان، ب واتەیا ژناڤبرنا سیاسەتا کۆلۆنیالیست یا کو د سەدسالا 20ێ دا ل دژی کوردستانێ هاتیە پەیرەوکرن دهێت. پشتی سەد سالان پارچەیەکا کوردستانێ ب فەرمی دەستێ هاریکاریێ درێژی پارچەیەکا دی یا کوردستانێ کر. ژ بۆ ڤێ یەکێ ژی د 16ێ جۆتمەھێ دا پەرلەمانێ کوردستانێ ب فەرمی ئاڤاکرنا ستاتۆیا کوردێن رۆژئاڤا ناس کر. ل سەر ڤێ دانپێدانێ چوونا ھێزێن پێشمەرگە بۆ کۆبانی ھاتە مسۆگەرکرن. ئەڤ دەرکەتن ب واتەیا رەدکرنا چارەنووسا کو ژ بۆ کوردان ھاتیە دیارکرن دهێت.

ئەم دکارین ببێژین کو چوونا پێشمەرگە بۆ کۆبانی ب واتەیا کو کوردان پەیمانا لۆزانێ و سیاسەتا لۆزانێ تێک بر دهێت. ب واتەیا رەدکرنا پارچەبوونا سەد سالان دهێت. ژ بۆ ڤێ ژی خەتا کو دڤێت کورد بپارێزن ئەو خەتە یا کو “پێشمەرگەیان دشینیتە کۆبانێ”. یێ کو ئەڤە ئەنجامدای، سەرۆکێ ھەرێما کوردستانێ یێ وی دەمی مەسعوود بارزانی بوو. بارزانی پیلانا ل دژی کوردان دیت و ژ بۆ تێکبرنا ڤێ پیلانێ گەلەک ریسک کر و د بەرژەوەندیا نەتەوەیا کورد دا بەرپرسیاریا چارەسەرکرنا پرسگرێکا کۆبانی گرتە سەر ملێن خوە. وی ھەموو ھێز و ئەزموونا خوە یا دیپلۆماتیک ژ بۆ هاریکاری و دەستوەردانا کۆبانێ بکار ئانی، نە تەنێ ھێزێن پێشمەرگە، ھەروەھا ھێزێن ھەڤپەیمانیا ناڤدەولەتی یا ل دژی داعشێ ژی دەستوەردان کرن.

بارزانی د ئاخافتنا خوە یا ژ بۆ پێشمەرگەیێن کو چوونە کۆبانێ دا گرنگیا کۆبانی ژ بۆ کوردان وەھا ئانی زمان: “دبیت کو چ یەک ژ هەوە ڤەنەگەریت و هوون هەموو شەھید ببن. لێ ئەڤە کوردپەروەریە، مە چ چارەیەکا دی نەمایە، دڤێت ئەم ئاخا خوە و گەلێ خوە بپارێزین.”

پێڤاژۆیا چوونا پێشمەرگە

یەکەمین کااروانێ پێشمەرگەیان د بن فەرمانداریا عەبدولقەھار دۆسکی دا ب چەکێن گران ڤە د 31ێ جۆتمەھا 2014ێ دا ژ بۆ شەرێ ل دژی داعشێ دەرباسی کۆبانێ بوو.

ھێزێن پێشمەرگە کو ھەتا پاقژکرنا کۆبانێ ب تەمامی ژ تەرۆریستێن داعشێ ل کۆبانێ مابوون، پشتی 26ێ چلەیا 2015ێ دەست ب ڤەگەرا بۆ ھەرێما کوردستانێ کرن.

کاروانێ یەکەم یێ ھێزێن پێشمەرگە د 28ێ جۆتمەھێ دا، کاروانێ دویەم د 3ێ کانوونێ دا و کاروانێ سێیەم ژی د 15ێ چلە دا گەھیشتن کۆبانێ. ل ھەر باژارێ کو کاروانێ پێشمەرگەیان ژ باکورێ کوردستانێ دەرباس دبوو، کوردان ب ئالایێن کوردستانێ و فیشەکێن ھەوایی پێشوازیا پێشمەرگەیان کر.

مەسعوود بارزانی ب ھەلکەفتا رزگارکرنا کۆبانی ژ دەستێ داعشێ پەیامەک بەلاڤ کر و وەھا گۆت: “ئیرۆ نووجەیێ رزگارکرنا کۆبانێ گەهیشتە دەستێ مە. ڤێ نووچەیێ ھەر کوردستانی و ئازادیخوازەک کەیفخوەش کر. ئەڤ سەرکەفتن سەرکەفتنا ھەموو گەلێ کوردستانێ یە. سەرکەفتنا مرۆڤاھیێ یا ل دژی ھۆڤیتیا تەرۆرێ یە.