د شەرێ د ناڤبەرا پەکەکە و دەولەتێ دا نە دەولەت و نە ژی پەکەکە خوسارەت نینە. بەلکو کورد، وەلاتێ کوردان؛ چییایێن کوردستانێ، باژارێن کوردستانێ، مالباتێن کورد و گەنجێن کوردان خوسارەتن.
ئەڤ دیمەنێن کو ئاژانسا ئانادۆل ڤێ داویێ بەلاڤ کری و گەنجێن کوردان ژ توونێلا دەردکەڤن و تەسلیمی دەوولەتا ترکیێ دبن شەرێ خەندەکا ئانی بیرا ھەرکەسی. گەنجێن کوردان ل مەها گولانا سالا 2016ێ ل نسێبینێ ووسا هاتبوون دیتن.
پەکەکە د ڤی شەرێ کو تێدا نایێ زانین چ ژ بۆی کوردا دخوازیت و ب ناڤێ دەمۆکراتیک کرنا ترکیایێ دمەشینیت، گەنجێن کوردان تێنە قوربانکرن. د شەرێ خەندەکان دا ھەرکەسێ دزانی ئەڤ رێبازا شەری شاشە، و دەولەت دێ ڤان باژاران خراب کەت و ھەرکەسی ژناڤ بەت. ل هندەک باژاران ب دەھان گەنج ھاتن کوشتن، نێزیکی 10 باژار خراب بوون، نێزیکی سەد مرۆڤ ب ساخی ھاتن شەوتاندن و ب دەھان گەنج ژی نەچار مان تەسلیم ببن.
نها ھەمان سییاسەت لێ ب ناڤێ توونێلێن شەری دهێتە مەشاندن. پەکەکە دەھان گەنجێن کوردان دکەتە توونێلێن شەری دا، د دەمەکێ دا کو دهێتە زانین دەولەت دێ وان دۆرپێچ کەت و ئەو گەنج دێ ب نەچاری مرن یان ژی تەسلیم بن. گەنجێن کوردان د ناڤ ڤان توونێلێن شەری دا کو ھەرکەس دزانیت ئەڤ بارە ژ تەمەنێ وان مەسترە دا دژین و مخابن کو بەرپرسێن پەکەکێ و مەدیایا وان ژی ڤێ یەکێ وەک بەرخوەدان ددەنە نیشاندان.
