سه‌رۆكێ هه‌رێما باشوورێ كوردستانێ راگهاند كو داعش هێژان ب خه‌ته‌ری ل سه‌ر ئاساییشا وه‌لات تێ حه‌ساب كرن و گۆ كو ئه‌مێ هه‌تا داویێ شه‌رێ ڤێ رێخستنا ته‌رۆریستی بكن.
سەرۆکێ هەرێما کوردستانێ نێچیرڤان بارزانی د پەیامەکێ دا راگه‌هاند، دوباره‌بوونا بەردەوام و به‌رفرەهبوونا هێرشێن تەرۆریستی، وێ راستیێ د سه‌لمینیت کو داعش هێژان ژی مەترسیەکا راستەقینەیە و ل سەر ئارامی و ئێمناهییا وەلات گەفە.
ل شەڤا رابووری تەرۆریستێن داعشێ ل ئه‌نییا کەرکووکێ هێرش کرن سەر هێزێن پێشمەرگە و د ئەنجامێ دا دو پێشمەرگە شەهید بوون.
سەرۆکێ هەرێما کوردستانێ د پەیاما خوە دە راگه‌هاند، پرسە و سەرساخیێ ل مالبات و کەسوکارێن سەربلندێن شەهیدێن جانفیدا «خالد حەمید هەیاس و ئاکۆ کەریم قادر» یێن لیوایا 10 یاى پەیادە یا سەر ب وەزارەتا پێشمەرگە ڤە دکه‌م کو شەڤا رابووری پشتی رووبرووبوونەکا قەهرەمانانە د دەما هێرشا داعشێ دا شەهید بوون و گیانێن خوە یێن پاک فه‌دایێ وه‌لات كرن.
د پەیامێ دا هات: «ژ دل ڤە هەڤسۆز و هەڤخەمێ مالبات و کەسوکارێن وان، تەڤاهییا هەڤال و هەڤسەنگەرێن وان و پێشمەرگەیێن قەهرەمانم، ژ نێزیک ڤە هەست ب ئێش و ئازارێن وان دکه‌م، ژ خودایێ مەزن دخوازم گیانێ شەهیدان ب دلۆڤانی و میهرەبانییا خوە شاد بکەت و سەبر و ئارامیێ بده‌ته هەموویان».
سەرۆکێ هەرێما کوردستانێ تەکەز دکەت، «دوباره‌بوونا بەردەوام و به‌رفرەهبوونا هێرشێن تەرۆریستی، وێ راستیێ دچەسپینن کو داعش هێژان ژی مەترسیەکا راستەقینەیە و ل سەر ئارامی و ئێمناهییا وەلات گەفە، ژ بەر وێ دڤێت ب ڤین و دەستەکی پۆلایی، ب هەڤکاری و هه‌ماهه‌نگییا پێشمەرگە، ئارتێشا ئیراقێ و هێزێن ئەولەهیێ و ب پشتەڤانییا هەڤپەیمانیا ناڤدەولەتی رووبروویی وان ببن، هەتا ب یەکجاری دهێته ژناڤبرن».
