عۆسمان بایدەمیر: یان دێ مێهڤانیا ل کوردستانێ قەبوول کەن، یان ژی جیرانەتیا وێ!

عۆسمان بایدەمیر: یان دێ مێهڤانیا ل کوردستانێ قەبوول کەن، یان ژی جیرانەتیا وێ!

پارلامەنتار و شارەدارێ بەرێ یێ دیاربەکرێ عۆسمان بایدەمر بەرسڤ دا پرسا دەربارێ بنچاڤکرنا وەلاتیێ ب ناڤێ جەمیل تاشکەسەن کو گۆتبوو مەرال ئاکشەنەرێ، ” ئەڤ دەر کوردستانە، تێ ئینکارکرن” و گۆت: “دڤێت داگیرکەر بزانن کو ئەو ئاخا نھا وەکە مێڤان لێ نە، یان دێ وەک کوردستان قەبوول کەن یان ژی دێ د پاشەرۆژێ دا بنە جیرانێن کوردستانێ.”

سەرۆکێ بەرێ یێ شارەداریا باژارێ مەزن یا ئامەدێ و پارلامەنتەرێ بەرێ یێ ھەدەپێ یێ رحایێ، عۆسمان بایدەمر ئیرۆ یەکشەمی 31ێ جۆتمەھا 2021ێ ل پاریسێ بەشداری بەرنامەیا بیرانینا پارێزگارێ کەرکووکێ یێ بەرێ نەجمەدین کەریم کر کو ژ ئالیێ ئەنستیتویا کوردی یا پاریسێ ڤە ھاتبوو سازکرن.

عۆسمان بایدەمیر پشتی بەرنامەیێ ل سەر بوویەرا ل سێرتێ یا نیقاشا د ناڤەبرا وەلاتیەکێ کورد و مەرال ئاکشەنەر دا ل سەر کوردستانێ بەرسڤا پەیامنێرێ رووداوێ زنار شینۆ دا و گۆت: “ل سەر دەستوورا هەوە و دەستوورا تەماشەڤانێن هەوە، ئەو برادەرێ مە (جەمیل تاشکەسەن) ئەز دلێ وی ماچی دکەم، ب راستی ژی مالا وی ھەزار جار ئاڤا و ئەو دەر کوردستانە و کوردستان ھەزار جاران ئاڤا. لازمە داگیرکەر بزانن کو ئەو ئاخا نھا وەکە مێهڤان لێ نە، وێ ئاخێ یان دێ وەک کوردستان قەبوول کەن ئان ژی دێ پاشەرۆژێ دا بنە جیرانێن کوردستانێ.”

بایدەمیر سیاسەتا ئینکارکرنا گەلێ کورد و چارەنڤیسا رەژیمێن ئینکارکەر ل رۆژھلاتا ناڤین ب بیر خست و دیار کر، “سەدام ژی کوردستان ناس نەدکر کو خوەدی ھێزەکا دیار بوو. رەژیما بەعسا سووریێ ژی کوردستان ناس نەدکر. رەوشا رەژیما بەعسێ ئیرۆ ل رۆژھلاتا ناڤین دیارە.”

بایدەمر بەحسا ھەولدانێن ئاشتیانەیێن گەلێ کورد د درێژیا دیرۆکێ دا کر و دا خویاکرن، تەڤی کو گەلێ کورد هەردەم دەستێ خویشک و براتیێ درێژ دکەت، لێ ئالیێن بەرامبەر “ژ خویشک و براتیێ فسم ناکەن”. بایدەمیر وەھا گۆت، “دڤێت ئەم باش بینین بیرا خوە کو مخابن ئەڤە ھەزار سالن کورد دەستێ خوە یێ خویشک و براتیێ درێژی وان دکەن. ب تایەبتی د ڤێ سەدسالا داویێ دا ئەم ژ بۆ خاترا کو شەر و پەڤچوون چێنەبن و مافێ مە بێنە ناسکرن مە دەستێ خوە درێژی وان کریە، لێ مخابن ئەو ژ خویشک و براتیێ فام ناکەن.”

سیاسەتڤانێ کورد عۆسمان بایدەمر د بەشەکا دی ژ ئاخافتنا خوە دا ل سەر ھەلوەستا خرابا سەرۆکای پارتیێ مەرال ئاکشەنەرا ل ھەمبەر وەلاتیێ کوردێ ل سێرتێ و دەستەسەرکرنا وی پشتی بکارانینا ناڤێ کوردستانێ نەرازیبوونا خوە وەھا نیشان دا و گۆت: “مەرال ئاکشەنەر یەک ژ ئۆپۆزسیۆنا ھەری بھێزە، لێ مخابن ئەو کوردستانێ ناس ناکەت. کەسەک دبێژیت “ئەڤ دەر کوردستانە یەکسەر دهێتە دەستەسەرکرن”. ھێژ مەرال نەبوویە دەستھلاتدار ئەڤ یەک دهێتە ئەنجامدان، گەلۆ ئەو ببیە دەستھلاتدار دێ چ کەت.”

بایدەمیر دیار کر، “دڤێت ئەم وەکە کوردێن چار پارچەیێن کوردستانێ بزانین کو ئەو مە وەکە خوشک و برا قەبوول ناکەن و مە وەکە خوە نابینن”  و وھا پێ دا چوو: “دڤێت ئەم ل کۆکا خوە ڤەگەرین و ل کۆکا خوە خوەدی دەربکەڤن و کۆکا مە کوردستانی یە و کوردستان ژی نە چار پارچەیە، بەلکو یەکە. دەما ئەو سینۆرە ھاتینە دانین ژ باب و کالێن مە نەپرسین و ژ مە ژی نەپرسین. لێ دڤێت ئیرۆ ئەم کوردستانێ بکەینە د ناڤ دل و مەژیێ خوە دا وەکە وی براداری مە جەمیل کری. وی دەمی چ داگیرکەر نەشێن کوردستانێ ژناڤ ببەن. ھەتا یەک کورد ھەبیت کوردستان دێ د دلێ وی دا ژیت و دێ مایندە ژی بیت.”

عۆسمان بایدەمیر ژی د سالا 2017ێ دا ژ بەر بکارانینا ناڤێ کوردستانێ د پارلامەنتۆیا ترکیێ دا راستی بەرتەکێن پارلامەنتەرێن ترک ھاتبوو و ل سەر پرسا سەرۆکا پارلامەنێ یا “کوردستان کو دەرە؟” ژی دەستێ خوە دانیبوو سەر دلێ خوە و گۆتبوو: “ئاھا ئەڤ دەرە بەرێز سەرۆک، ئاھا ئەڤدەرە کوردستان.”

بایدەمیر ژ بەر بکارانینا ناڤێ “کوردستان”ێ ب ئاوایەکی دەمکی ژ پارلامەنتۆیا ترکیێ ژی ھاتبوو دەرخستن.