سەرۆکێ ئەنەکەسێ: بلا کادرێن پەکەکە ژ رۆژئاڤایێ کوردستانێ دەرکەڤن

سەرۆکێ ئەنەکەسێ: بلا کادرێن پەکەکە ژ رۆژئاڤایێ کوردستانێ دەرکەڤن

سەرۆکێ ئەنەکەسێ سعوود مەلا داخواز ژ پەکەکێ دکەت، دەستێوەردانێ د کارووبارێن رۆژئاڤایێ کوردستانێ دا نەکەت و کادرێن خوە ژی ڤەکشینیت.

سەرۆکێ ئەنجوومەنا نشتمانی یا کورد ل سووریێ (ئەنەکەسە) سعوود مەلا د ھەڤپەیڤینەکێ دا لگەل رۆژنامەیا “کوردستان” دەربارێ دانووستاندنێن د ناڤبەرا ئەنەکەسێ و پارتیێن یەکیتیا نشتمانی یا کوردی (پەیەنەکێ) دا راگھاند، ئەو ب سەرخستنا دانووستاندنێن لگەل پەیەنەکێ دا نە.

سەرۆکێ ئەنەکەسێ دەستنیشان کر: “ئەگەر ئەم گەھشتین رێکەفتنەکێ کو د بریارێن سیاسی، ئیداری، ئابۆری و لەشکەری دا ھەڤبەش بین، ئەم رەد دکەین کو پەکەکە خوەدی بریار بیت.”

سعوود مەلا تەکەز کر: “پەیاما مە ژ بۆی وان ئاشکەرایە، دڤێت کادرێن پەکەکێ دەرکەڤن و ئەگەر کەسەک ژ وان بمینیت ژی، دڤێت چ بریار د دەستێ وی دا نەبن.”

ھەروھا سەرۆکێ ئەنەکەسێ گۆت: ” پەیەدێ باوەری ب تێگەھا ھەڤبەشیێ نینە.”

گۆت ژی: “ئەم وەک ئەنەکەسە دبینین کو دانووستاندنا لگەل کادرێن سووری دا باشترە. دڤێت کادرێن پارچەیێن دی یێن کوردستانێ ڤەگەرن جھێن خوە. دڤێت پەیەدە ژی گرتیێن سیاسی سەربەست بەردەت.”

سعوود مەلا ئاماژە ب رۆلا مەسعوود بارزانی د یەکرێزیا کوردی ل رۆژئاڤایێ کوردستانێ دا کر و گۆت: “سەرۆک بارزانی ژ دەستپێکێ ڤە خواست ئەم یەکرێز بین. مە بەرسڤا داخوازا سەرۆک بارزانی دا و 3 رێکەفتن ھاتن ئیمزاکرن، لێ پەیەدێ باوەری ب دیالۆگ، لێبۆرین، پێکڤەژیان و خەباتا ھەڤبەش نینە.”