د سالڤەگەرا 4ێ مژدارێ دا کو سەلاحەدین دەمیرتاش و پارلامەنتەرێن ھەدەپێ یێن وێ دەمێ ھاتبوون بنچاڤکرن، ھەدەپێ ل دیاربەکرێ جڤینەکا چاپەمەنیێ ل دار خست. ھات ئاماژەکرن کو ئۆپەراسیۆنا 4ێ مژدارێ ھەمبەر ئیرادەیا گەلێ کورد ھاتبوو کرن، لێ کورد تێک نەچوون.
پارتیا دەمۆکراتیکا گەلان (ھەدەپێ) ل دیاربەکرێ د سالڤەگەرا 4ێ مژدارێ دا جڤینەک چاپەمەنیێ ل دار خست کو 5 سال بەرێ ٤ێ مژدارێ دا سەلاحەدین دەمیرتاش و پارلامەنتەرێن وێ دەمێ یێن ھەدەپێ ھاتبوون بنچاڤکرن.
د دەما داخویانیا چاپەمەنیێ دا ھێزێن ئەولەکاریێ ژی بەرگریێن بەرفرەھیێن ئەولەکاریێ ستاندن. داخویانی ژ ئالیێ ھەڤسەرۆکێ ھەدەپێ یێ شاخا دیاربەکر زیاد جەیلان ڤە ھات خواندن و جەیلان ئاماژە کر کو پشتی ھلبژارتنا 7ێ خزیرانێ وەک تۆلھلدانەکێ ئۆپەراسیۆنا 4ێ مژدارێ ھات ل دارخستن.
زەیاد جەیلان دیار کر: “خواستن ب ئۆپەراسیۆنێن بنچاڤکرن و گرتنان مە بترسینن. لێ ئەم دێ ب بریارداری ل سەر مەشا خوە بەردەوام بین.”
رایەدار و پارلامەنتەرێن ھەدەپێ بالێ دکێشن کو ھەر چقاس ب ئۆپەراسیۆنا 4ێ مژدارێ ھاتبیت خواستن کو ھەدەپە و ئیرادەیا کوردان بهێتە قەلسکرن، ئەڤ یەک ب سەر نەکەتیە.
پارلامەنتەرا ھەدەپێ یا دیاربەکر رەمزیا تۆسون ئانی زمان دەستھلاتێ ئەرکێن دەولەتێ بۆ بەرژەوەندیێن خوە ب کار ئانینە.
رەمزیا تۆسون ژ K24ێ را راگھاند: “ترسا وان ئەو بو کو ھەدەپە ببیتە ئیقتیدار. خواستن ھەدەپێ قر بکەن. لێ ب سەر نەکەتن، ھەدەپە نەقەدیا، ھەڤسەرۆک نەقەدییان و ھەدەپە دێ بیتە دەستھلاتدار.”
د 4ێ مژدارا سالا 2016ێ دا ھەڤسەرۆکێن ھەدەپێ یێن وێ دەمێ سەلاحەدین دەمیرتاش و فیگەن یوکسەکداگ ژی تێ دا 11 پەرلەمانتەر ھاتبوون بنچاڤکرن 9 پەرلەمانتەر ھاتبوون گرتن کو سەلاحەدین دەمیرتاش و فیگەن یوکسەکداگ ھین د گرتیگەھێ دا نە.
