ئالیکارێ لێکۆلینێ یێ زانینگەھا فراتێ حەفزوللاهـ کوتوم ژ بەر پۆست کرنا تویتەکێ کو تیدا نڤیساندبوو “شۆرەشا ئیلۆنێ ل ھەموو کوردان پیرۆز بیت، بژی کوردستان” ژ ئالیێ سەرۆکاتیا زانینگەهێ ڤە ژ وەزیفەیێ ھات دوورخستن و پشترا ئیرۆ ھات بنچاڤکرن. ھەر وەھا کوتوم راگھاند کو ل سەر حەسابا وی یێ مەدیایا جڤاکی یا تویتەرێ ژی گەف ل وی ھاتینە کرن.
د داخویانیا کو ژ ئالیێ سەرۆکاتیا زانینگەھا فراتێ ڤە ھاتیە بەلاڤکرن دا ئەڤ یەک هات گۆتن: “ئالیکارێ لێکۆلینێ یێ کو دھات دیتن ب پۆستێن خوە یێن د تویتەرێ دا پرۆپاگاندایا رێخستنا تەرۆرێ دکەت ژ ئالێێ سەرۆکاتیا زانینگەها مە ڤە ژ کار هاتە دەرکرن و دەر بارێ وی دا لێپرسین ھات دەستپێکرن. دەربارێ کەسێ ناڤبۆری دا ژی سکالا ل دادگەهێ هاتیە تۆمارکرن.” کوتوم ھێژ ژی د گرتیگەھێ دایە.
“ئەز نە ژ بەر حەساسیەتێن یاسایی بەلکو ژ بەر فکارێن سیاسی ژ کار ھاتمە دەرکرن”
کوتوم کو دوھی ئێڤاری ل سەر تویتەرێ پۆستەک بەلاڤ کر، دیار کر کو ئەو ژ وەزیفەیێ ھاتیە دەرکرن و گەف ل وی ھاتینە کرن و وەھا گۆت: “نە ژ بەر حەساسیەتێن یاسایی بەلکو ژ بەر فکارێن سیاسی ئەز ژ کار ھاتم دەرکرن. ل زانینگەهێ کەسێن کو ئەز وان ناس ناکم ھەنە. و ئەو نە خوەندکارن. ب کێمانی نە ئەو خوەندەکارن کو ئەز ناس دکم. ل بەر دەریێ من ل بەندا منن. ئەز هەست ب تشتەکێ ب گەف دکم. گەر ل سەر من گەفێن توندوتیژیێ ھەبن ئەز دێ مافێ خوە یێ خوەپاراستنێ ب تەمامی بکار ئینم.
چ قەومی؟
د لێپرسینا کو ل دژی کوتوم ھاتیە ڤەکرن دا ژ بەر پۆستێن وی یێن ل سەر مەدیایا جڤاکی ھشیاری ھات دایین. ژ کوتومێ کو ژ بەر پۆستێن خوە هاتبوو بنچاڤکرن، ھات پرسین کو وی ب چ ئارمانجێ ئەڤ پۆست کریە و نڤیسینا د وێنەیێ دا “تەھدیدەکێ ل سەر یەکپارچەبوونا خاک و ئەولەھیا سینۆرێن کۆمارا ترکیایێ دکەت یان نە”. کوتوم د پارێزنامەیا خوە دا گۆت، “داخویانی و ئالایێ کوردستانێ یا د وێنەی دا د پەیوەندیێن فەرمی یێن کۆمارا ترکیا و حکوومەتا ھەرێما کوردستانێ دا ھاتیە بکارئانین.” ھەر وەھا دیار کر کو د چارچۆڤەیا ھەڤدیتنێن فەرمی یێن سەرۆک کۆمار ئەردۆگان و مەسعوود بارزانی و مەسروور بارزانی دا ژی ناڤێ “کوردستان” و ئالایێ کوردستانێ ھاتینە بکارئانین.
